राजारामबापू नाट्यगृहाच्या नूतनीकरणाचे काम संथगतीने

लोकमत न्यूज नेटवर्क

इस्लामपूर : तत्कालीन सत्ताधारी राष्ट्रवादीने इस्लामपूर पालिकेच्या माध्यमातून शहरातील मध्यवर्ती ठिकाणी उभारलेल्या राजारामबापू नाट्यगृहाची अवस्था दिवसेंदिवस बिघडत चालली आहे. या नाट्यगृहाचे नूतनीकरण करण्यासाठी पालिका सभागृहात ठरावही झाले आहेत; परंतु हे काम संथगतीने सुरू आहे. सध्या बाल्कनी परिसरात अडगळीत असलेले सामान अस्ताव्यस्त टाकले आहे. त्यामुळे येथे दुर्गंधी आणि अस्वच्छता पसरली आहे.

इस्लामपुरात सांस्कृतिक कार्यक्रम घेण्यासाठी पालिकेचे राजारामबापू पाटील यांच्या नावाने एकमेव नाट्यगृह आहे. या ठिकाणी विविध सांस्कृतिक कार्यक्रम होतात. अलीकडील काळात शालेय वार्षिक स्नेहसंमेलनही मोठ्या प्रमाणात होऊ लागली आहेत. परंतु, या नाट्यगृहाकडे पालिका प्रशासनाचे पूूर्णपणे दुर्लक्ष आहे. नाट्यगृह सुरू झाल्यापासूनच साऊंडचा आवाज दबला आहे. तेथील स्वच्छतागृहाची अवस्था असून नसल्यासारखी आहे. स्पॉटलाईट गायब झाले आहेत. त्यामुळे या नाट्यगृहाचे नूतनीकरण करण्यासाठी पालिकेने आर्थिक तरतुदी केल्या आहेत. परंतु, कोरोना महामारीमुळे हे नाट्यगृह गेल्या वर्षभरात बंद अवस्थेत होते. या कालावधीतच नाट्यगृहाचे नूतनीकरण होऊ शकले असते. परंतु, त्याला मुहूर्त लागलेला नाही.

याचाच फायदा येथील एका संस्थेने घेऊन बाल्कनी परिसरात अडगळीतले सामान रचले आहे. परिणामी येथे मोठ्या प्रमाणात अस्वच्छता आहे. कोरोना निवळत आल्याने पुन्हा आता काही संस्था करमणुकीच्या कार्यक्रमाचे नियोजन करीत आहेत. परंतु, नाट्यभाड्ये व्यतिरिक्त साऊंड, लाईटस् यासाठी वेगळा खर्च करावा लागत असल्याने या नाट्यगृहाकडे कलाकारासह नाट्यरसिकांनी पाठ फिरविली आहे.

कोट

या नाट्यगृहाचा रंगमंच अपुरा असल्याने मोठे कार्यक्रम होऊ शकत नाहीत. स्पॉट लाईटचीही कमतरता आहे. चांगल्या प्रतीचा साऊंड सिस्टीम नाही. बसण्याच्या खुर्च्या आरामदायी नाहीत. स्वच्छतागृहाचा आणि पाण्याचा अभाव आहे. याची कल्पनाही आमचे नेते जलसंपदा मंत्री जयंत पाटील यांना दिली आहे.

-रोझा किणीकर, माजी अध्यक्षा, नाट्यपरिषद, इस्लामपुर

फोटो - २४०१२०२१-आयएसएलएम-इस्लामपूर न्यूज

राजारामबापू पाटील नाट्यगृह नूतनीकरणापासून वंचित आहे. त्यातच बाल्कनीत टाकलेले अडगळीचे सामान.