जत पूर्वभागातील रस्ते कर्नाटककडून बंद

लोकमत न्यूज नेटवर्क

संख : कोरोना रुग्णांची संख्या वाढू लागल्याने सीमाभागातून कोरोनाचा शिरकाव होऊ नये यासाठी कर्नाटक पोलीस, आरोग्य आणि महसूल यंत्रणा अलर्ट झाली आहे. सीमा बंद करून सुरक्षाव्यवस्था कडक केली आहे. विजापूरला जाणारे सीमेलगत असणारे सर्व रस्ते बॅरिकेड‌्स लावून बंद करण्यात आले आहेत. महाराष्ट्रातून येणाऱ्या वाहनाना, लोकांनी प्रतिबंध केले जात आहे.

तालुक्याच्या उत्तरेला सोलापूर जिल्हा हद्द आणि दक्षिणेला बेळगाव जिल्हा हद्द लागते. पूर्वभागाला विजापूर जिल्ह्याची हद्द आहे. पूर्वभागातील ६४ गावांचे व्यवहार विजापूर जिल्ह्याशी निगडित आहेत. विजापूर, इंडी तालुक्याच्या सीमा लागून आहेत. सोनलगी, सुसलाद, अक्कळवाडी, कोणबगी, धुळकरवाडी, मुचंडी, कागनरी, उमदी, सिद्धनाथ, उमराणी, गिरगाव, रावळगुंडवाडी, गुलगुंजनाळ, जालीहाळ खुर्द, कोंतवबोबलाद, माणिकनाळ या गावापासून कर्नाटकाला जोडणाऱ्या सीमा आहेत.

या भागातील बहुतांश नागरिकांचे नातेवाईक सीमाभागात आहेत. आर्थिक व्यवहार, व्यापार, किराणा माल, शेतीविषयक औषधे, साहित्य, अन्य बाबीची खरेदी-विक्रीची कामे कर्नाटकातील विजापूर, अथणी, चडचण या शहराशी निगडित आहेत.

सीमाभागातील कागनरी ते यत्नाळ, ढोकळेवाडी जालगिरीतांडा, धुळकरवाडी ते घोणसगी, जालीहाळ खुर्द ते ऐगनाळ, सिद्धनाथ ते कनमडी, कोंतवबोबलाद ते विजापूर, उमदी ते चडचण, कोंकणगाव, तिकोंडी ते यत्नाळ, मुचंडी ते कनमडी, उमराणी ते ककमरी हे रस्ते बॅरिकेड‌्स लावून बंद केले आहेत.

कर्नाटक पोलीस येणाऱ्या-जाणाऱ्या वाहनांची तपासणी करीत आहेत. मास्क न वापरणाऱ्यांवर कारवाई करत आहेत. सीमेवर पोलिसांचा २४ तास कडा पहारा आहे.

कोट

उमदी पोलिसांनी मंगळवेढा, चडचण, कोंतवबोबलाद सीमेवर बॅरिकेड‌्स लावलेले आहेत. तिकोंडी रस्त्यावर बंदोबस्त ठेवला आहे.

दत्तात्रय कोळेकर,

पोलीस निरीक्षक, उमदी.