संग्राम कदमची आत्महत्या आर्थिक कारणातूनच?

इस्लामपूर : शहरातील जुनी भाजी मंडई परिसरातील अपार्टमेंटमध्ये भाड्याने राहणाऱ्या ३१ वर्षीय युवकाने गळफास घेऊन आत्महत्या केल्याची घटना गुरुवारी सायंकाळी घडली. घटनास्थळावरून पोलिसांनी जप्त केलेल्या मोबाईलमध्ये पैशासाठी तगादा लावणाऱ्या ८ ते १० जणांचे बोलणे हाती लागल्याचे समजते. मात्र मृताच्या कुटुंबीयांकडून अद्याप रितसर फिर्याद दाखल न झाल्याने पोलीस या घटनेची प्राथमिक चौकशी करत आहेत.

संग्राम वसंतराव कदम (वय ३१, रा. कापूसखेड नाका, इस्लामपूर) असे आत्महत्या केलेल्या युवकाचे नाव आहे. तो एका गॅरेजमध्ये काम करत होता. दुचाकी गाड्यांची साखळी पद्धतीने विक्री करण्याच्या व्यवसायात त्याच्याकडे अनेकजणांनी पैशाची गुंतवणूक केल्याची चर्चा आहे. या व्यवहारात संग्राम कदम पुरता गुरफटून गेला होता. बऱ्याचजणांनी पैशासाठी त्याच्याकडे तगादाही लावला होता. शेवटी हा त्रास असह्य झाल्याने त्याने आत्महत्या केली असल्याची शक्यता व्यक्त केली जात आहे.

संग्रामच्या पत्नीने पतीच्या आत्महत्येच्या घटनेची वर्दी देतानाच या मृत्यूची पोलिसांनी चौकशी करावी, अशी मागणी केली आहे. सहायक पोलीस निरीक्षक प्रवीण साळुंखे अधिक तपास करीत आहेत.

फोटोे - १२०२२०२१-आयएसएलएम- संग्राम कदम