अंबक येथील सरपंच आरक्षण बदलणार ?

लोकमत न्यूज नेटवर्क

कडेगाव : कडेगाव तालुक्यातील ग्रामपंचायतींच्या सरपंचपदाचे आरक्षण नुकतेच जाहीर करण्यात आले आहे. यात अंबक येथील सरपंच पदाचे आरक्षण अनुसूचित जाती स्त्री आरक्षण पडले आहे. मात्र, या प्रवर्गासाठी प्रभाग आरक्षणात एकही जागा नव्हती. त्यामुळे विजयी उमेदवारात या प्रर्वगातील एकही महिला सदस्य नाही. परिणामी सरपंचपद रिक्त राहणार आहे. याचा गावाच्या विकासावर विपरीत परिणाम होऊ नये यासाठी येथील सरपंचपदाचे आरक्षण बदलण्यात यावे अशी मागणी ग्रामस्थांतून होत आहे. याबाबत शासन स्तरावर अधिकृत निर्णय व्हावा, अशी अपेक्षा व्यक्त होत आहे.

अंबक ग्रामपंचायतीची निवडणूक नुकतीच पार पडली. काँग्रेस आणि भाजपमध्ये सामना झाला. यात काँग्रेसने १०, तर भाजपने एक जागा जिंकली आहे. विजयी उमेदवारात सर्वसाधारण, सर्वसाधारण स्त्री, नागरिकांचा मागास प्रवर्ग, नागरिकांचा मागास प्रवर्ग स्त्री, अनुसूचित जाती या प्रवर्गातील उमेदवार आहेत. यातील बहुतांश उमेदवारांना आपल्याच प्रवर्गातील आरक्षण पडेल. अशी अपेक्षा होती. मात्र, आरक्षण सोडत झाल्यानंतर या सर्वांचीच निराशा झाली. अनुसूचित जाती स्त्री प्रवर्गातील उमेदवारच नसल्याने आता सरपंचपद रिक्त राहणार आहे. उपसरपंच पदाची निवडही सरपंच यांच्या अध्यक्षतेखाली बोलविलेल्या विशेष बैठकीत केली जाते. यामुळे आता उपसरपंच निवड कशी होणार याबाबतही उत्सुकता आहे. प्रशासनाने सरपंच निवडीचे निकष लावून उपसरपंच निवड तरी तातडीने घ्यावी आणि सरपंच पदाचा कारभार उपसरपंचांकडे सोपवावा. असा एक मतप्रवाह अंबक येथे सुरू झाला आहे. यामुळे आता सरपंच आरक्षण बदलणार की उपसरपंच कार्यभार पाहणार याकडे ग्रामस्थांचे लक्ष लागले आहे.

चौकट -

निवडणुकीनंतर सोडतीचा परिणाम

सरपंच आरक्षण सोडत निवडणुकीपूर्वी झाली असती आम्ही नियमानुसार योग्य त्या जागेवर अनुसूचित जाती स्त्री उमेदवार

निवडून आणला असता. शासनाने निवडणुकीनंतर आरक्षण सोडत घेतल्याचा हा परिणाम आहे. अशी प्रतिक्रिया ग्रामस्थांमधून व्यक्त हाेत आहे.

फोटो : ३० कडेगाव १

ओळ : अंबक (ता. कडेगाव) येथे सरपंच आरक्षणाबाबत ठोस निर्णयाच्या प्रतीक्षेत असलेले ग्रामस्थ व नूतन सदस्यांमध्ये ग्रामपंचायतीसमोर चर्चा रंगल्या हाेत्या.