सोलापूर-मिरज एक्स्प्रेस सुपरफास्ट, तिकीट दरात १५ रुपयांनी वाढ

सोलापूर-मिरज एक्स्प्रेस गुरुवारपासून सुपरफास्ट एक्स्प्रेस करण्यात आली आहे. तसेच सोलापूर व मिरज येथून ही गाडी सुटण्याच्या वेळेतही बदल करण्यात आला आहे

मिरज : सोलापूर-मिरज एक्स्प्रेस गुरुवारपासून सुपरफास्ट एक्स्प्रेस करण्यात आली आहे. तसेच सोलापूर व मिरज येथून ही गाडी सुटण्याच्या वेळेतही बदल करण्यात आला आहे. याच्या प्रवासी तिकीट दरात १५ रुपयांनी वाढ झाली आहे.

सोलापूर-मिरज एक्स्प्रेस सकाळी ६.०५ वाजता सुटून मिरजेत दुपारी १२.०५ वाजता येते. पण आता ही गाडी सोलापूर येथून सकाळी ७.०५ वाजता सुटून मिरजेत ११.५० वाजता येईल, तर मिरज येथून दुपारी ३.२५ ऐवजी ४ वाजता सुटेल व सोलापूर येथे रात्री ८.५५ ऐवजी ८.५० वाजता पोहोचेल.
सोलापूर-मिरज एक्स्प्रेस सुपरफास्ट करण्यात आल्यामुळे मिरज-सोलापूर प्रवासी वेळेत ४० मिनिटे, तर सोलापूर-मिरजच्या वेळेत १ तास २० मिनिटे इतकी बचत होणार आहे. सोलापूर-मिरज एक्स्प्रेस आता सुपरफास्ट एक्स्प्रेस करण्यात आल्यामुळे गाडीच्या क्रमांकात बदल करण्यात आला असून तो आता २२१५५/२२१५६ असा करण्यात आला आहे. मिरज-सोलापूर सुपरफास्ट एक्स्प्रेस आणि कोल्हापूर-सोलापूर एक्स्प्रेसला प्रवाशांचा प्रतिसाद वाढत असल्याने सकाळी ९ ते ९.३० यादरम्यान सोलापूरसाठी मिरज येथून आणखी एक एक्स्प्रेस सुरू करावी, अशी मागणी मिरज रेल्वे कृती समितीचे सचिव सुकुमार पाटील यांनी केली आहे.