Crime News Sangli: व्यसनाधीन वडिलांचा सतत त्रास, संतप्त मुलाने भर चाैकात केला पित्याचा खून

पाेलीस ठाण्यापासून हाकेच्या अंतरावर भर चाैकात काेयत्याने केले सपासप वार

कुरळप : कुरळप (ता. वाळवा) येथे व्यसनाधीन वडिलांच्या सततच्या त्रासाला कंटाळून मुलाने पाेलीस ठाण्यापासून हाकेच्या अंतरावर भर चाैकात वडिलांवर काेयत्याने सपासप वार केले. गंभीर जखमी झालेल्या वडिलांचा सांगलीच्या शासकीय रुग्णालयात उपचारादरम्यान मृत्यू झाला. सुरेश भीमराव पाटील (वय ५४, रा. वशी, ता. वाळवा) असे मृताचे नाव असून हल्ल्यानंतर मुलगा प्रथमेश सुरेश पाटील (२०) स्वत:हून कुरळप पाेलीस ठाण्यात हजर झाला. त्याच्याविराेधात खुनाचा गुन्हा दाखल झाला आहे. मंगळवारी दुपारी तीन वाजता ही घटना घडली.

वशी येथील सुरेश पाटील गावातील एका खासगी दूध संस्थेमध्ये सचिव म्हणून अनेक वर्षापासून काम करत होते. त्यांना दारूचे व्यसन होते. या व्यसनातून ते कुटुंबाला सतत त्रास देत होते. या त्रासाला कंटाळून १५ वर्षांपूर्वी त्यांच्या पत्नीने पेटवून घेऊन आत्महत्या केली होती. उभयतांना मुलगा व मुलगी आहे. पत्नीच्या मृत्यूनंतर आजी-आजोबा दाेन्ही मुलांचा सांभाळ करत होते.

सुरेश पाटील मात्र व्यसनाच्या आहारी जाऊन सतत कुटुंबाला त्रास देत होते. मंगळवार दुपारी ते मद्य प्राशन करण्यासाठी कुरळपला गेले होते. तेथे मद्य प्राशन करून चौकात कट्ट्यावर बसले होते. यावेळी अचानक मुलगा प्रथमेशने समाेर येऊन त्यांच्या मानेवर कोयत्याने सपासप वार केले. ते रक्तबंबाळ झाल्याचे पाहून प्रथमेश जवळच असलेल्या कुरळप पाेलीस ठाण्यात हजर झाला.

गंभीर जखमी झालेल्या सुरेश पाटील यांना तातडीने कुरळप प्राथमिक आरोग्य केंद्रात दाखल करण्यात आले. मात्र मानेवरील जखम खोलवर असल्याने प्राथमिक उपचार करून त्यांना पुढील उपचारासाठी सांगलीच्या शासकीय रुग्णालयात पाठविण्यात आले. उपचारादरम्यान रात्री त्यांचा मृत्यू झाला. याप्रकरणी मुलगा प्रथमेशवर खुनाचा गुन्हा दाखल करण्याची कार्यवाही रात्री उशिरापर्यंत सुरु हाेती. अधिक तपास पोलीस उपनिरीक्षक दीपक जाधव करत आहेत.

अखेरच्या श्वासापर्यंत शिवीगाळ

कुरळप येथील पाेलीस ठाण्यापासून हाकेच्या अंतरावर असलेल्या चौकात ही घटना घडली. सुरेश पाटील यांच्या मानेवरील खाेलवर जखम पाहून चौकात जमलेल्या लोकांचे मन हेलावले. अत्यंत गंभीर जखमी असतानाही ते मुलाला अखेरच्या श्वासापर्यंत शिव्या देत होते.