आटुगडेवाडी खिंडीत उसाचा ट्रॅक्टर उलटला

लोकमत न्यूज नेटवर्क

कोकरूड : कऱ्हाडहून करुंगली येथील दालमिया साखर कारखान्याकडे चाललेला ऊस भरलेला ट्रॅक्टर आटुगडेवाडी (मेणी) येथील खिंडीत ट्रॉल्यांसह उलटला. यामुळे कऱ्हाड- शेडगेवाडी रस्त्यावरील वाहतुकीची कोंडी झाली होती. तासाभराच्या अथक प्रयत्नांतून ही वाहतूक सुरू करण्यात आली.

दालमिया शुगर कारखान्याकडे चाललेला ऊस ट्रॅक्टर आटुगडेवाडी खिंडीत आला असता, मागील दोन ट्रॉल्या उलटल्या. पाठीमागून येणाऱ्या वाहनांनी वेळीच वाहने थांबविल्याने मोठी हानी टळली. ऊस तोडणी यंत्रातून तोडलेल्या कांड्या ट्रॉलीत भरलेल्या होत्या. ट्रॉल्या उलटल्याने पूर्ण रस्त्यावर उसाच्या कांड्या पसरल्या होत्या. त्यामुळे वाहनांच्या एक किलोमीटर लांबच लांब रांगा लागल्या. अर्ध्या तासाने क्रेनच्या साहाय्याने ट्रॅक्टर ट्रॉलीसह बाजूला काढण्यात आला. जेसीबीच्या साहाय्याने उसाच्या कांड्याही बाजूला करून मार्ग मोकळा करण्यात आला.