जत येथे तरुणाची आत्महत्या
By लोकमत न्यूज नेटवर्क | Published: February 5, 2021 07:19 AM2021-02-05T07:19:34+5:302021-02-05T07:19:34+5:30
जत : जत येथील घरात किरण रामचंद्र माळी (वय ३०, मूळ रा. रामपूर गौसिद्धा मळा) याने कर्जबाजारीपणाला कंटाळून गळफास ...
जत : जत येथील घरात किरण रामचंद्र माळी (वय ३०, मूळ रा. रामपूर गौसिद्धा मळा) याने कर्जबाजारीपणाला कंटाळून गळफास घेऊन आत्महत्या केली. ही घटना मंगळवारी सायंकाळी चार वाजण्याच्या दरम्यान घडली. याप्रकरणी त्याचा भाऊ राजू रामचंद्र माळी यांनी रात्री उशिरा जत पोलिसांत फिर्याद दाखल केली आहे.
याबाबत अधिक माहिती अशी की, किरण माळी हा श्रीकृष्ण ब्लड सेंटर या नावाने कवठेमहांकाळ येथे ब्लड बँक चालवत होता. मागील चार ते पाच वर्षांपासून तो तेथेच सासुरवाडीत राहत होता. लॉकडाऊन सुरू झाल्यानंतर ब्लड बँक बंद केली होती. मागील दोन-तीन महिन्यांपासून तो रामपूर येथे राहण्यासाठी आला होता.
जत शहरात होलसेल दरात गोळ्या बिस्कीट व इतर साहित्य विकण्याचा तो व्यवसाय करत होता. जत शहरात त्याचे घर व गोदाम होते. या व्यवसायासाठी व ब्लड सेंटरसाठी खासगी सावकार व काही सहकारी संस्थांकडून त्यांनी कर्ज घेतले होते. त्या कर्जाची परतफेड त्याला वेळेत करता आली नव्हती. मोठ्या प्रमाणात कर्ज व त्यावरील व्याज थकीत झाल्यामुळे तो मानसिक तणावाखाली वावरत होता. याशिवाय खासगी सावकारांनी त्याच्या पाठीमागे सतत पैशाचा तगादा लावला होता. याला कंटाळुन त्याने मंगळवारी सायंकाळी जत येथील घरात गळफास घेऊन आत्महत्या केली.
चाैकट
सोशल मीडियावर पोस्ट
मंगळवारी सायंकाळी किरण माळी याने मृत्यूची सोशल मीडियावर पोस्ट टाकली. त्यानंतर त्याने गळफास घेऊन आत्महत्या केली. त्याच्या पश्चात पत्नी, मुलगा, मुलगी, आई, वडील असा परिवार आहे. या प्रकरणाचा पुढील तपास पोलीस हवालदार सचिन हाक्के करत आहेत.
फोटो-२७किरण माळी