डफळापूर येथे तरुणाची आत्महत्या

संख : डफळापूर (ता. जत) येथील सिद्धरामेश्वर मल्लय्या स्वामी (वय ३४) या युवकाने शेती व व्यवसायातील सततच्या अपयशाने शेतातील घरात गळफास घेऊन आत्महत्या केली. ही घटना शनिवारी मध्यरात्री घडली. याबाबत जत पोलीस ठाण्यात नाेंद आहे.

सिद्धरामेश्वर याचे डफळापुरात सायकल दुरुस्तीचे दुकान आहे. शनिवारी तो नेहमीप्रमाणे सायकल दुकान बंद करून गावातील घरात जेवण करून शेतातील घरात मुक्कामासाठी गेला. मध्यरात्री त्याने घराला आतून कडी लावून दोन्ही हात बांधून घेत अँगलला गळफास लावून घेतला. सकाळी बराच वेळ तो घरी आला नाही. त्याचा मोबाइलही बंद असल्याने त्याच्या भावाने मळ्यात जाऊन पाहिले असता हा प्रकार समोर आला.

दरम्यान सिद्धरामेश्वर याने मृत्युपूर्वी चिठ्ठी लिहून ठेवल्याचे समजते. दरम्यान, जत पोलिसांनी घटनास्थळी पंचनामा केला. सिद्धरामेश्वर यांने मोठ्या कष्टाने शेतीसह व्यवसायात चांगले बस्तान बसविले होते. त्यासाठी बँक, माइक्रो फायनान्स पतसंस्थेतून कर्ज घेतले होते. काढलेले कर्ज कोरोना लॉकडाऊनमुळे फिटत नसल्याने ताे तणावाखाली होता.

याच नैराश्यातून त्याने आत्महत्या केल्याचा प्राथमिक अंदाज पाेलिसांनी वर्तविला. सिद्धरामेश्वर याच्या पश्चात पत्नी, आई, भाऊ असा परिवार आहे. याबाबत जत पोलीस ठाण्यात नाेंद असून, अधिक तपास सहायक उपनिरीक्षक पवार करीत आहेत.