चिखलहोळत ऊसतोड मजुरांच्या ट्रॅक्टरला भीषण अपघात

लोकमत न्यूज नेटवर्क

विटा : इस्लामपूरहून विटामार्गे टेंभूर्णीकडे ऊसतोड मजुरांना घेऊन जाणाऱ्या ट्रॅक्टरवरील चालकाचा ताबा सुटल्याने दोन्ही ट्रॉली पलटी होऊन झालेल्या भीषण अपघात झाला. यात ट्रॅक्टरमधील पाच ऊसतोड मजूर जखमी झाले. ही घटना बुधवारी सकाळी ८ वाजण्याच्या सुमारास विटा ते माहुली रस्त्यावर चिखलहोळ फाट्याजवळ घडली. अपघातातील जखमी नांदेड जिल्ह्यातील वहाद (ता. खंदार) गावचे रहिवासी आहेत.

बुधवारी सकाळी २५ ऊसतोड मजुरांना घेऊन ट्रॅक्टर इस्लामपूरहून विटा, मायणीमार्गे टेंभूर्णीकडे चालला होता. सकाळी ८ च्या सुमारास ट्रॅक्टर चिखलहोळ फाट्याजवळ आला असता चालकाचा ताबा सुटून पाठीमागील दोन्ही ट्रॉली रस्त्याच्या बाजूला पलटी झाले. त्यानंतर ट्रॅक्टर नाल्यात पलटी झाला. या अपघातात अमोल मुक्तीराम जाधव, राजू मुक्तीराम जाधव, मोहन पांडुरंग वाघमारे, मुरलीधर धोंडिबा जाधव, व्यंकटी निवृत्ती जाधव असे पाचजण किरकोळ जखमी झाले.

अपघाताची माहिती मिळताच माजी जिल्हा परिषद उपाध्यक्ष सुहास बाबर यांनी तातडीने रुग्णवाहिका पाठवून जखमींना ग्रामीण रुग्णालयात दाखल केले. या ट्रॅक्टरमध्ये सुमारे २५ ऊसतोड मजूर होते. परंतु, कोणतीही जीवितहानी झाली नाही. जखमींना उपचारानंतर घरी पाठविण्यात आले.