रोहित पाटील यांची संपत्ती ८६ लाख रुपये, एकही गुन्हा नाही 

सांगली : दिवंगत माजी उपमुख्यमंत्री आर. आर. पाटील यांचे पुत्र रोहित पाटील यांच्या नावे स्थावर व जंगम अशी एकूण ८६ लाख ८० हजार ९७५ रुपयांची मालमत्ता आहे. कोणत्याही वित्तीय संस्थेचे देणे त्यांच्या नावावर नसल्याची नोंद विधानसभा निवडणुकीत सादर केलेल्या प्रतिज्ञापत्रात करण्यात आली आहे.

तासगाव-कवठेमहांकाळ मतदारसंघातून रोहित पाटील यांनी उमेदवारी दाखल केली आहे. ते प्रथमच निवडणूक रिंगणात उतरले आहेत. २०२३-२४ च्या वार्षिक आयकर विवरणपत्रात त्यांनी ८ लाख ८७ हजार ७८८ इतके उत्पन्न दाखविले आहे. त्यांच्या नावे कोणतेही वाहन नसल्याचे नमूद आहे. शेतजमिनीचा तसेच अंजनी येथील निवासी इमारतीचा उल्लेख प्रतिज्ञापत्रात करण्यात आला आहे. व्यवस्थापन शास्त्रातील पदवी त्यांनी घेतली आहे. सध्या त्यांचे वय २५ वर्षे आहे.

मालमत्तेचे विवरण असे

• जंगम मालमत्ता २८,४२,७५५
• स्थावर मालमत्ता ५८,३८,२२०