मेंढ्या चोरणाऱ्या तिघांना अटक

तासगाव : शिरगाव- कवठे (ता. तासगाव) येथून तीन मेंढ्या चोरल्याप्रकरणी कवठेएकंद येथील तीन जणांना तासगाव पोलिसांनी अटक केली आहे. याप्रकरणी मेंढपाळ रघुनाथ तातोबा शेळके (रा. कण्हेरीवाडी, ता. करवीर, जिल्हा कोल्हापूर) यांनी तासगाव पोलिसांत फिर्याद दाखल केली आहे.

अटक केलेल्यांत बजरंग रंगराव शिरतोडे, राहुल जाधव व प्रकाश शिरतोडे

(तिघे, रा. कवठेएकंद) यांचा समावेश आहे. याबाबत पोलिसांतून मिळलेली माहिती अशी की, शेळके यांच्या छत्तीस हजार रुपये किमतीच्या तीन मेंढ्या बुधवारी रात्री चोरीस गेल्या होत्या. या चोरीबाबत पोलिसांनी तातडीने हालचाली करून या तीन संशयितांना तातडीने अटक केली आहे.

हातनोली येथे जमीन वादातून जनावरांना मारले

तासगाव :

हातनोली (ता. तासगाव) येथे जमीन वादातून एका महिलेने तीन म्हशी, एक रेडकू व एक गाय युरिया चारून मारल्याचा प्रकार घडला आहे. याप्रकरणी तासगाव पोलिसांत गुन्हा दाखल झाला आहे. माणकाबाई बाळासाहेब जाधव यांनी तासगाव पोलिसांत फिर्याद दाखल केली आहे.

शारदा उत्तम जाधव असे गुन्हा दाखल झालेल्या महिलेचे नाव आहे. माणकाबाई आणि शारदा यांच्यात जमिनीचा जुना वाद आहे. या वादातून चिडून जाऊन शारदाने गव्हाच्या पिठाच्या कणिकमधून युरिया मिसळून माणकाबाई यांच्या तीन म्हशी, एक रेडकू, दोन गायी यांना चारले. यात तीन म्हशी एक रेडकू व एक गाय मृत्युमुखी पडली आहे, तर एक गायीवर उपचार सुरू आहेत.