डफळापूरजवळ ट्रॅक्टरच्या धडकेत दुचाकीस्वार ठार

जत : डफळापूर (ता. जत) येथील देवाप्पा मल्लाप्पा तेली (वय ५०) यांना ऊस वाहतूक करणाऱ्या ट्रॅक्टरची धडक बसून त्यांचा अपघाती मुत्यू झाला. ही घटना गुरुवारी रात्री १० वाजण्याच्या सुमारास डफळापूर ते जत रस्त्यावर हॉटेल प्रीतमसमोर घडली. याप्रकरणी शुक्रवारी रात्री उशिरा जत पोलिसांत गुन्हा दाखल करण्यात आला आहे. या गंभीर घटनेमुळे धोकादायक ऊस वाहतुकीचा प्रश्न गंभीर बनल्याचे स्पष्ट झाले आहे.

याबाबत सविस्तर माहिती अशी की, ट्रॅक्टर डफळापूरहुन जतला निघाला हाेता. यावेळी दुचाकीवरून शेताकडे निघालेल्या देवाप्पा तेली यांना पुढील वाहनाच्या हेडलाईटमुळे समोरून येणारा ट्रॅक्टर दिसला नाही. त्यामुळे त्यांची मोटारसायकल थेट ट्रॅक्टरवर जाऊन आदळली. अपघातात ते गंभीर जखमी झाले. उपचारासाठी त्यांना सांगली येथे घेऊन जात असताना वाटेतच त्यांचा मृत्यू झाला. या घटनेची जत पोलिसांत नोंद झाली असून पुढील तपास सुरू आहे.

चौकट

जत शहर व परिसरातील प्रत्येक रस्त्यावर ऊस वाहतूक करणाऱ्या वाहनांच्या संख्येत वाढ झाली आहे. त्यातील बहुसंख्य वाहनांना रिफ्लेक्टर नाही. त्यामुळे ही वाहतूक जीवघेणी ठरू लागली आहे. पोलीस व प्रशासनाने याकडे लक्ष द्यावे, अशी मागणी नागरिकांतून होत आहे.

फोटो : ०२ देवाप्पा तेली