भारतीय मजदूर संघाच्या प्रदेश सचिवपदी विशाल मोहिते

वांगी : भारतीय मजदूर संघाच्या प्रदेश सचिवपदी वांगी (ता. कडेगाव) येथील ॲड‌. विशाल हणमंतराव मोहिते यांची निवड करण्यात आली आहे. त्याचबरोबर रत्नागिरी व सांगली जिल्हा प्रभारी म्हणून जबाबदारी देण्यात आली आहे.

भारतातील सर्वांत मोठी कामगार संघटना असलेल्या भारतीय मजदूर संघ महाराष्ट्र प्रदेश मंत्री म्हणून ॲड‌. विशाल मोहिते यांची नियुक्ती करण्यात आली आहे. ही निवड केंद्रीय निवड समितीने केली असून महाराष्ट्रातील सर्व खासगी कामगार, औद्योगिक क्षेत्राचे प्रभारी म्हणूनही ते काम पाहणार आहेत.

भारतीय मजदूर संघाचे गेले अनेक वर्षे काम करत असलेले ॲड‌. विशाल मोहिते हे महाराष्ट्र शासनाच्या महाराष्ट्र राज्य सुरक्षा रक्षक सल्लागार समितीचे सदस्य म्हणूनही काम पाहत आहेत.

गेले अनेक वर्ष शोषित पीडित वंचित कामगारांच्या प्रश्नासाठी लढणारे व्यक्तिमत्त्व म्हणून त्यांची ओळख आहे. अनेक आंदोलने करून त्यांनी कामगारांचे प्रश्न मार्गी आहेत तसेच रचनात्मक कार्यक्रमातून कामगारवर्गाला एक दिशा देण्याचे महत्वपूर्ण योगदान त्यांनी दिले आहेत.