जयसिंगपूरच्या संघास विजेतेपद आंबवडेतील व्हॉलिबॉल स्पर्धा : सरपंच चषक वरिष्ठ गट व्हॉलिबॉल

आंबवडे (ता. पन्हाळा) येथील शंभूराजे क्रीडा मंडळाच्या वतीने आयोजित सरपंच चषक वरिष्ठ गट व्हॉलिबॉल स्पर्धेत जयसिंगपूरच्या संघाने पन्हाळ्याच्या शाहू क्रीडा मंडळावर रोमहर्षक विजय मिळवत स्पर्धेचे

पन्हाळा : आंबवडे (ता. पन्हाळा) येथील शंभूराजे क्रीडा मंडळाच्या वतीने आयोजित सरपंच चषक वरिष्ठ गट व्हॉलिबॉल स्पर्धेत जयसिंगपूरच्या संघाने पन्हाळ्याच्या शाहू क्रीडा मंडळावर रोमहर्षक विजय मिळवत स्पर्धेचे अजिंक्यपद मिळवले, तर शाहू क्रीडा मंडळाला उपविजेतेपदावर समाधान मानावे लागले. तृतीय क्रमांक साखराळे (ता. इस्लामपूर) येथील जयवंत स्पोर्टस् संघाने मिळवला.

अंतिम सामन्यात जयसिंगपूरच्या संघाने २२-२५, २५-२२, १५-११ अशा २-१ सेटनी शाहू क्रीडा मंडळावर मात केली. जयसिंगपूर संघाकडून रोहित नांद्रेकर, पवन सावंत, अनूप पाटील, शुभम वडर, प्रतीक पाटील यांनी अप्रतिम खेळाचे प्रदर्शन केले, तर शाहू क्रीडा मंडळाकडून अबिद मोकाशी, सौरभ गोसावी, योगेश वराळे, प्रीतम भारमल यांनी आपल्या जिगरबाज खेळाचे प्रदर्शन करत प्रेक्षकांची मने जिंकली.

बेस्ट स्मॅशर म्हणून पन्हाळ्याच्या अबिद मोकाशी, तर बेस्ट प्लेअर शुभम समुद्रे, बेस्ट लिफ्टर प्रतीक पाटील या जयसिंगपूरच्या संघातील खेळाडूंना वैयक्तिक पारितोषिक देण्यात आले.
बक्षीस वितरण समारंभ उद्योगपती अक्षय लाड, आंबवडेचे सरपंच अरुण जगदाळे, उपसरपंच भाऊसो मोहिते, पिपळे तर्फ सातवे गावचे सरपंच तानाजी पाटील, आंबवडेचे माजी सरपंच धनाजी गुरुव यांच्या हस्ते झाले. यावेळी पोलीस पाटील महादेव कांबळे, रिपब्लिकन पार्टी आॅफ इंडियाचे जिल्हाध्यक्ष दिनकर कांबळे, ग्रा. पं. सदस्य राजेंद्र जाधव, गीताजंली पोवार, शकुंतला जगदाळे, विकास पाटील यांच्यासह उपस्थित होते.
आंबवडे येथील शंभुराजे क्रीडा मंडळाच्यावतीने आयोजित व्हॉलिबॉल स्पर्धेत शाहू क्रीडा मंडळाला पारितोषिक प्रदान करताना मान्यवर दिसत आहेत.