रघुराज मेटकरी यांना यशवंतराव चव्हाण साहित्य पुरस्कार

लोकमत न्यूज नेटवर्क

विटा : उत्कृष्ट वाग्मय निर्मितीचा राज्यस्तरीय यशवंतराव चव्हाण साहित्य पुरस्कार विटा (जि. सांगली) येथील साहित्यिक रघुराज मेटकरी यांना जाहीर करण्यात आला आहे. त्यांच्या ‘स्वातंत्र्य लढ्यातील सुवर्णरत्ने’ या पुस्तकासाठी हा पुरस्कार जाहीर झाला आहे. कोल्हापूर जिल्ह्यातील भोगावती महाविद्यालयाचे प्राचार्य डॉ. दिनकरराव पाटील यांनी या पुरस्काराची घोषणा केली.

कोल्हापूर येथील शांताई शिक्षण संस्थेच्या सन २०१९-२० या वर्षात प्रकाशित झालेल्या सर्वोत्कृष्ट पुस्तकाला हा पुरस्कार प्रदान करण्यात येणार आहे. या पुरस्काराचे स्वरूप मानपत्र, रोख ५ हजार रुपये, शाल, श्रीफळ, पुष्पहार असे आहे. या पुरस्कार निवड समितीत प्रा. कीर्ती राहुल कदम, अभियंता अजिंक्य पाटील, प्रा. धनाजी वाघ, प्रा. तानाजी निकम व प्रा. डॉ. दिनकरराव पाटील यांचा समावेश होता.

विटा येथील साहित्यिक रघुराज मेटकरी यांना ‘यशवंतराव चव्हाण’ यांच्या नावाने दिला जाणारा साहित्य पुरस्कार जाहीर झाल्याने साहित्य वर्तुळात आनंद व्यक्त होत आहे. मेटकरी हे विटा येथे गेली ३९ वर्षे ग्रामीण मराठी साहित्य संमेलनाचे आयोजन करतात. त्यांचे विविध साहित्यही प्रकाशित झाले आहे.

चौकट

आजपर्यंतचा गौरव...

रघुराज मेटकरी यांना यापूर्वी महाराष्ट्र राज्याचा उत्कृष्ट वाग्मय निर्मितीचा ‘ग. ह. पाटील पुरस्कार’, राज्य शासनाचा ‘आदर्श शिक्षक पुरस्कार’, ‘व्यसनमुक्ती कार्य पुरस्कार’, पुणे येथील विनोद प्रतिष्ठानचा ‘आचार्य अत्रे पुरस्कार’, दक्षिण महाराष्ट्र साहित्य सभेचा ‘उत्कृष्ट वाग्मय पुरस्कार’ अशा विविध पुरस्कारांनी त्यांचा गौरव करण्यात आला आहे.