सांगलीत किरकोळ कारणावरुन तरुणाला मारहाण

सांगली : शहरातील पंचशील नगर रेल्वे फाटकाजवळ तरुणाला दगडाने मारुन जखमी करण्यात आले. दुचाकी थांबवून मोबाईलवर बोलत असलेल्या तरुणांना गाडी बाजूला घेऊन बोला, असे म्हटल्याने हा प्रकार घडला. याप्रकरणी आदर्श सुनील साळुंखे (रा. जामवाडी, सांगली) याने रोहित गोसावी व अन्य एकजण (दोघेही रा. वाल्मिकी आवास, सांगली) यांच्याविरोधात शहर पोलिसात फिर्याद दिली आहे.

पोलिसांनी दिलेली माहिती अशी की, शनिवारी रात्री साडेआठच्या सुमारास फिर्यादी आदर्श व त्याचे दाजी अजय चव्हाण हे दोघे दू‌ध घेऊन पंचशील नगर रेल्वे फाटकाजवळून जात होते. यावेळी संशयित दुचाकी थांबवून मोबाईलवर बोलत होते. चव्हाण यांनी त्यांना गाडी बाजूला घेऊन बोला, असे म्हटल्याने झालेल्या वादावादीत संशयितांनी आदर्श यांना दगडाने मारुन जखमी केले.