नवजाला ३४ मिलिमीटर पाऊस

सातारा : जिल्ह्याच्या पश्चिम भागात २० दिवसांपासून पावसाची उघडीप होती. पण, गुरुवारपासून तुरळक प्रमाणात हजेरी लावण्यास सुरुवात केली आहे. शुक्रवारी सकाळपर्यंत नवजाला सर्वाधिक ३४ मिलिमीटर पाऊस झाला. तसेच कोयनेसह महाबळेश्वरलाही पावसाने हजेरी लावली. पूर्व भागात तुरळक पाऊस झाला.

जिल्ह्यात जून महिन्याच्या मध्यावर मुसळधार पाऊस झाला होता. विशेष करुन पश्चिम भागात धुवाधार पाऊस झालेला. यामुळे पश्चिमेकडील प्रमुख धरणांत पाणीसाठा वेगाने वाढण्यास सुरुवात झाली होती. तर शेतकऱ्यांनी पेरणीची लगबग सुरू केली. असे असतानाच गेल्या २० दिवसांपासून पावसाने दडी मारली होती. त्यामुळे पश्चिमसह पूर्व भागातील खरीप हंगामातील पेरणी खोळंबलेली. धरणातही पाण्याची आवक कमी होत होती. पण, गुरुवारपासून पुन्हा जिल्ह्यात पाऊस पडण्यास सुरुवात झाली आहे.

शुक्रवारी सकाळपर्यंतच्या २४ तासांत कोयनानगर येथे १९ मिलिमीटर पाऊस झाला, तर जूनपासून कोयनानगरला ९५६ मिलिमीटर पावसाची नोंद झाली आहे. नवजाला ३४ व आतापर्यंत ११४९ मिलिमीटर पर्जन्यमान झाले आहे. तर महाबळेश्वरला १० आणि जूनपासून १२९९ मिलिमीटर पाऊस पडला आहे. जिल्ह्यात आतापर्यंत महाबळेश्वरला सर्वाधिक पावसाची नोंद झालेली आहे. सकाळच्या सुमारास कोयना धरणात ४१.३५ टीएमसी एवढा पाणीसाठा होता. तर १२३४ क्युसेक वेगाने पाणी आवक होत होती. धरणाच्या पायथा वीजगृहातून होणारा विसर्ग पूर्णपणे बंद आहे.

दरम्यान, सातारा शहर व परिसरात बुधवारी आणि गुरुवारी पावसाने चांगली हजेरी लावली. पण, शुक्रवारी दिवसभर ढगाळ वातावरण होते. तर पूर्व भागात काही ठिकाणी अल्प पाऊस झाला.