वाई तालुक्यात एप्रिल महिन्यात ३५४२ बाधित

वाई : तालुक्यात कोरोनाचा कहर वाढला असून, अनेक रुग्णांना बेड, व्हेंटिलेटर, रेमडेसिविर इंजेक्शनची कमी जाणवत असून, उपलब्ध रुग्णांच्या नातेवाइकांची धावपळ होताना दिसत आहे. खासगी हॉस्पिटलमध्ये दाखल करणे सामान्य माणसाला आर्थिक अडचणींमुळे उपचार करणे कठीण झाले आहे. १ एप्रिलनंतर राज्यासह देशात कोरोना बाधितांच्या संख्येत झपाट्याने वाढ होत आहे. कोरोनाची दुसरी लाट असून परिस्थिती हाताबाहेर जाते काय अशी परिस्थिती आहे.

वाई शहर व तालुक्यात कोरोनाबाधितांची संख्या ही लक्षणीय वाढत आहे. राज्यात काही जिल्ह्यांत कोरोनाचा वाढता संसर्ग तसेच विषाणूचा नवीन आलेला ट्रेंड यामुळे चिंतेचे वातावरण आहे.

वाई तालुक्यात एप्रिलमध्ये ३५४२ रुग्ण सापडले असून, अलीकडच्या काही दिवसांत शंभर ते दोनशेच्या घरात येत आहे. मार्च महिन्यात ४३८ रुग्ण पॉझिटिव्ह सापडले होते. राज्यासह देशात जानेवारी महिन्यात कोरोनाच्या लसीकरणाला सुरुवात केली. लसीकरणाचा पाहिला, दुसरा टप्पा होऊन आता तिसऱ्या टप्प्यातील लसीकरण चालू आहे. कोरोनाची साखळी तोडण्यासाठी शासनाने ‘ब्रेक द चेन’ अभियान चालू केले आहे. वाई शहरातून विनाकारण फिरणाऱ्या वाहनधारकांवर पोलीस प्रशासनाच्यावतीने कडक कारवाई करण्यात येत आहे. वाई ग्रामीण व शहरातील रुग्णांची गैरसोय होऊ नये म्हणून किसनवीर महाविद्यालयाच्या मुलांच्या हॉस्टेलमध्ये विलगीकरण कक्ष ऑक्सिजन बेडची वाढती गरज पाहता ग्रामीण रुग्णालयात ऑक्सिजन बेड वाढविण्यात येणार असून, पाच व्हेंटिलेटर बेडची सोय केली जाणार आहे तसेच मॅप्रो हॉस्पिटल मध्ये ३० ऑक्सिजन बेड ६ व्हेंटिलेटर बेड तयार करण्यात आले आहे, अशी माहिती तहसीलदार रणजित भोसले यांनी दिली आहे तरी नागरिकांनी प्रशासनाने घालून दिलेल्या नियमांचे कडक पालन करावे, असे आवाहन आमदार मकरंद पाटील, प्रांताधिकारी संगीता राजापूरकर, तहसीलदार रणजित भोसले, गटविकास अधिकारी उदयकुमार कुसूरकर, नगराध्यक्षा डॉ. प्रतिभा शिंदे, उपनगराध्य अनिल सावंत, वाई पालिकेच्या मुख्याधिकारी विद्यादेवी पोळ, पोलीस निरीक्षक आनंदराव खोबरे, तालुका आरोग्य अधिकारी संदीप यादव यांनी केले आहे.