वीजबिलांच्या थकबाकीचा ३९४ कोटींचा डोंगर

सातारा : गेल्या दोन महिन्यांत पुणे, सातारा, सोलापूर, सांगली व कोल्हापूर जिल्ह्यांमध्ये लघुदाब घरगुती, वाणिज्यिक व औद्योगिक वर्गवारीतील ९ लाख ९० हजार वीज ग्राहकांनी वीजबिलांचे तब्बल ३९४ कोटी २२ लाख रुपये थकविले आहेत. त्यामुळे महावितरणची आर्थिक घडी विस्कटली असून, थकीत व चालू वीजबिलांचा भरणा करून सहकार्य करावे, असे आवाहन महावितरणचे प्रादेशिक संचालक अंकुश नाळे यांनी केले आहे.

सद्यस्थितीत या वर्गवारीतील २८ लाख ५५ हजार ग्राहकांकडे १ हजार ३५९ कोटी ४ लाखांची थकबाकी झाली आहे. पुणे प्रादेशिक विभागात मार्चअखेर लघुदाब वर्गवारीच्या घरगुती, वाणिज्यिक व औद्योगिक १८ लाख ६५ हजार ५० ग्राहकांकडे ९६४ कोटी ८३ लाख रुपयांची थकबाकी होती. मात्र एप्रिल व मे महिन्यांत वीजबिलांचा भरणा न झाल्यामुळे सद्यस्थितीत २८ लाख ५५ हजार वीजग्राहकांकडे ही थकबाकी १ हजार ३५९ कोटी ४ लाखांवर गेली आहे. या दोन महिन्यांत सर्वाधिक ८ लाख ६ हजार ८६६ घरगुती ग्राहकांकडे २१० कोटी ३१ लाख, १ लाख ६० हजार ४५० वाणिज्यिक ग्राहकांकडे ११७ कोटी तसेच २२ हजार ८२४ औद्योगिक ग्राहकांकडे ६६ कोटी ८९ लाख रुपयांची थकबाकी वाढली आहे.

कोरोना विषाणूच्या दुसऱ्या लाटेच्या व तौक्ते चक्रीवादळाच्या आपत्कालीन परिस्थितीमध्ये महावितरणचे वीजयोद्धे वीजपुरवठा सुरळीत ठेवण्यासाठी अहोरात्र व अविश्रांत राबले आहेत. आता पावसाळा सुरू झाल्याने महावितरणची सर्व यंत्रणा युद्धपातळीवर सज्ज आहे. मात्र वर्षभरापासून वीजबिलांचा व थकबाकीचा भरणा होत नसल्याने महावितरणची आर्थिक स्थिती गंभीर झाली आहे.

चौकट :

सद्यस्थितीत लघुदाब घरगुती, वाणिज्यिक व औद्योगिक ग्राहकांकडे (कंसात ग्राहक)

जिल्हा ग्राहक थकबाकी

पुणे जिल्हा : १२ लाख ९७ हजार २२५ ग्राहक: ७३५ कोटी ९५ लाख,

सातारा जिल्हा : ३ लाख १६ हजार ८२० ग्राहक : ७७ कोटी ७३ लाख,

सोलापूर जिल्हा ४ लाख ३५ हजार २१० ग्राहक : १८८ कोटी ४८ लाख,

सांगली जिल्हा ३ लाख २१ हजार १५० ग्राहक : १२१ कोटी ४१ लाख

कोल्हापूर जिल्हा : ४ लाख ८४ हजार ७७० ग्राहक : २३५ कोटी ४८ लाख रुपयांची थकबाकी आहे.

................