भांडणाची मिटवामिटवी करताना कुटुंबाला मारहाण

लोकमत न्यूज नेटवर्क

सातारा : चार दिवसांपूर्वी झालेल्या भांडणाची मिटवामिटवी करत असतानाच एका कुटुंबातील सदस्यांना बेदम मारहाण करण्यात आली. ही घटना सातारा तालुक्यातील जकातवाडी येथे घडली असून, याप्रकरणी सातारा तालुका पोलीस ठाण्यात पाच जणांवर गुन्हा दाखल करण्यात आला आहे.

ऋषिकेश संतोष धनवडे, रोहित संतोष धनवडे, संतोष खाशाबा धनवडे, शंकर खाशाबा धनवडे, सचिन खाशाबा धनवडे (सर्व रा. जकातवाडी, ता. सातारा) अशी गुन्हा दाखल झालेल्यांची नावे आहेत. याबाबत पोलिसांनी दिलेली माहिती अशी की, जकातवाडी येथील जयश्री मनोहर धनवडे (वय ४५) यांच्या राहत्या घरासमोर २ जुलै रोजी भांडणे झाली होती. ही भांडणे मिटवण्यासाठी दिनांक ४ रोजी सायंकाळी सहा वाजता जयश्री धनवडे यांच्या राहत्या घरासमोर बैठक सुरू होती. या वेळी वरील संशयितांनी फिर्यादी जयश्री धनवडे यांना व त्यांचा मुलगा गणेश, शुभम व पती मनोहर धनवडे यांना हाताने व लाथाबुक्क्यांनी मारहाण केली. तसेच त्यांचा मोठा मुलगा गणेश याला लाकडी दांडक्याने पाठीवर व हातावर मारहाण केली. यामध्ये तो जखमी झाला. या प्रकारानंतर जयश्री धनवडे यांनी सातारा तालुका पोलीस ठाण्यात धाव घेऊन तक्रार दाखल केली. त्यानंतर पोलिसांनी वरील पाच संशयितांविरोधात मारहाणीचा गुन्हा दाखल केला.