भाजपचा मंगळवारी फलटण पालिकेवर मोर्चा

फलटण : खासदार रणजीतसिंह नाईक-निंबाळकर यांच्या नेतृत्वाखाली फलटण नगरपालिकेच्या गलथान कारभाराचा निषेध करण्यासाठी मंगळवार, २८ सप्टेंबर २०२१ रोजी सकाळी दहा वाजता फलटण शहर भारतीय जनता पार्टीतर्फे नगरपालिकेवर निषेध मोर्चा काढण्यात येणार असल्याची माहिती भाजपचे शहराध्यक्ष अमोल सस्ते यांनी दिली.

भारतीय जनता पार्टी फलटण शहरच्या वतीने फलटण नगर परिषदेला निषेध मोर्चाबाबत निवेदन देण्यात आले. याप्रसंगी भाजप शहराध्यक्ष अमोल सस्ते, नगरसेवक अशोक जाधव, सचिन अहिवळे, भाजप ओबीसी सेलचे अध्यक्ष राजेश शिंदे उपस्थित होते.

फलटण शहरातील पाणीपुरवठा, सार्वजनिक स्वच्छतागृहे, भुयारी गटार योजना, रस्ते व्यवस्थापन, झाडेझुडपे यांची वाढ, डास प्रादुर्भाव, या अनुषंगाने रोगराई वाढली आहे साथीच्या रोगांचा फैलाव झाला असून, नगरपालिकेचा गलथान कारभार सुरू आहे. या सर्व गोष्टींचा निषेध करण्यासाठी भारतीय जनता पार्टी फलटण शहराच्या वतीने मोर्चा काढून निवेदन देणार आहोत.

निवेदन नगरपालिकेचे उपमुख्याधिकारी मुश्ताक महात यांनी स्वीकारले. मोर्चा गजानन चौक, श्रीराम मंदिर, शिंपी गल्ली, रविवारपेठ, बारामती चौक, छत्रपती शिवाजी महाराज चौक, भारतरत्न डॉ. बाबासाहेब आंबेडकर चौक, महावीर स्तंभ मार्गे फलटण नगर परिषदेवर जाईल. शासकीय नियमांचे पालन करून हा निषेध मोर्चा काढणार असल्याचे निवेदनात म्हटले आहे.