नागरिकांनी लस घ्यावी : शेखर सिंह

सातारा : ‘लस ही सुरक्षित असून कोरोनापासून स्वतःचा बचाव करण्यासाठी जिल्ह्यातील सर्व नागरिकांनी लस घ्यावी,’ असे आवाहन जिल्हाधिकारी शेखर सिंह यांनी केले आहे.

यूनिसेफ, सीवायडीए पुणे, सातारा जिल्हा प्रशासन व यशवंतराव चव्हाण स्कूल ऑफ सोशल वर्क सातारा यांच्या संयुक्त विद्यमाने, कऱ्हाड, खटाव व फलटण तालुक्यातील गावांत लसीकरणाबाबत असणारे समज-गैरसमज दूर करण्यासाठी व जनजागृती करण्यासाठीची विशेष मोहीम हाती घेण्यात आली आहे. या मोहिमेच्या प्रारंभप्रसंगी ते बोलत होते.

यावेळी युनिसेफ महाराष्ट्राचे आनंद घोडके व देविका देशमुख, आपत्ती व्यवस्थापन कक्षाचे देविदास ताम्हाणे, सीवायडीए पुण्याचे संचालक प्रवीण जाधव, समाजकार्य महाविद्यालयाच्या प्राचार्य डॉ. शाली जोसेफ हे उपस्थित होते. लसीकरण जनजागृती मोहीम राबविण्यासाठी युनिसेफ सीवायडीए व समाजकार्य महाविद्यालयाचा पुढाकार कौतुकास्पद असल्याचे जिल्हाधिकारी शेखर सिंह यांनी यावेळी सांगितले.