कोरोनाच्या सावटाखाली प्रचाराचा नारळ

इस्लामपूर आणि शिराळा तालुक्यांमधील सर्वच निवडणुकांच्या प्रचाराचा नारळ पुणे-बेंगलोर महामार्गावरील काळमवाडी येथील काळमादेवीच्या दारात फुटतो. कृष्णा कारखान्याच्या तिन्ही पॅनलकडूनही देवीचे दर्शन घेऊनच प्रचाराला सुरुवात होते. यंदाच्या निवडणुकीवर कोरोनाचे सावट असल्याने इच्छुक उमेदवार मोजक्याच कार्यकर्त्यांसोबत देवीचे दर्शन घेताना दिसत आहेत.

कऱ्हाड-वाळवा तालुक्यातील कृष्णा काठावरील जमीन ओलिताखाली आली आणि परिसरात उसाचे फड दिसू लागले. त्यावर प्रक्रिया करणारा सहकारी तत्त्वावर उभारलेला कृष्णा कारखाना ऊस उत्पादकांसाठी वरदान ठरला. सुखसमृद्धी आली. प्रत्येक साखर कारखान्याने आपापल्या परिसरात मंदिरांची उभारणी केली आहे. सत्तेवरील अध्यक्ष त्या-त्या मंदिरांत जाऊन दर्शन घेऊनच दररोजच्या कार्यालयीन कामकाजाला सुरुवात करतात. काळमवाडीतील काळमादेवी वाळवा-शिराळा तालुक्यातील राजकीय नेत्यांचे श्रद्धास्थान बनले आहे.

लोकसभा, विधानसभा, जिल्हा परिषद, पंचायत समिती निवडणूक प्रचाराचा नारळ काळमवाडी येथेच फोडला जातो. शिराळा मतदार संघातील आमदार मानसिंगराव नाईक, माजी आमदार शिवाजीराव नाईक, सत्यजीत देशमुख, सम्राट महाडिक आदी नेते प्रचाराचा नारळ येथेच फोडतात. जलसंपदामंत्री जयंत पाटील यांचेही ते श्रद्धास्थान आहे. कृष्णेच्या निवडणुकीतील पॅनलप्रमुखही वाळवा तालुक्यात प्रचारासाठी येतात, तेव्हा येथूनच प्रचाराला सुरुवात करतात.

कृष्णा कारखान्याचे अध्यक्ष डॉ.सुरेश भोसले यांनी रुग्णसेवा, स्वत:च्या संस्था आणि साखर कारखाना यांचा प्राधान्यक्रम ठरविला आहे. माजी अध्यक्ष डॉ.इंद्रजीत मोहिते काही कार्यकर्त्यांचे अनुकरण करतात. मात्र, ज्येष्ठ विचारवंत यशवंतराव मोहिते यांच्या कार्याचे स्मरण करून दिल्याशिवाय सभासदाला पुढे जाऊ देत नाहीत. असे असले, तरी सर्वच पॅनलप्रमुख कार्यकर्त्यांच्या श्रद्धा जपतात आणि प्रचाराचा नारळ काळमवाडीत फोडतात. तेथूनच प्रचाराचा धडाका सुरू होतो. यंदा मात्र, निवडणुकीवर कोरोनाचे सावट असल्याने, इच्छुक उमेदवार मोजक्याच कार्यकर्त्यांसोबत देवीचे दर्शन घेताना दिसत आहेत.

संस्थापक पॅनलचे माजी अध्यक्ष अविनाश मोहिते रेठरे बद्रुक येथून बाहेर पडताना आपल्या ग्रामदेवताचे दर्शन घेतात. त्यानंतर, आपल्या दिनचर्येला सुरुवात करतात. प्रत्येक शनिवारी पुनदी तालुका पलूस येथील मारुती मंदिरात जाऊन दर्शन घेण्याचा उपक्रम असतो. त्यांच्या कार्यकर्त्यांनी काळमा देवीला नारळ फोडून प्रचारला सुरुवातही केली.

- अशोक पाटील, इस्लामपूर

——————————————-