नगरसेवक, महसूल राज्यमंत्री ते धमाकेदार लोकप्रिय खासदार

सातारा : छत्रपती घराण्याचे थेट तेरावे वंशज असलेल्या खासदार उदयनराजे भोसले यांनी कायम सर्वसामान्यांमध्ये मिसळून राहण्याचा प्रयत्न केला. राजकारणातील त्यांचे उमेदवारीचे दिवस त्यांचीही सत्त्वपरीक्षा बघणारे होते. पण अनेक चढउतार आणि आरोपांच्या दिव्यातून गेल्यानंतर त्यांनी नगरपालिकेत एकहाती सत्ता घेतली. त्यानंतर गेल्या दीड दशकात त्यांनी मागे वळून पाहिले नाही. सामान्यांची नाळ ओळखून त्यांना घायाळ करणाऱ्या उदयनराजे यांच्यासमोर कुठलीच लाट टिकाव धरू शकत नाही, हे पुन्हा एकदा सिद्ध झाले आहे.
सातारा लोकसभा निवडणुकीत घवघवीत यश संपादन केलेल्या खासदार उदयनराजे भोसले यांनी तरुण आणि सामान्य हे त्यांचे ‘फोकस’ ठेवले. सातारा नगरपालिकेतून त्यांच्या राजकीय कारकिर्दीला सुरुवात झाली. पहिल्यांदा अपयश पचविल्यानंतर त्यांनी लोक आग्रहास्तव पुन्हा तालुक्यात लक्ष घालण्याचा प्रयत्न केला. पितृछत्र हरपल्यामुळे त्यांना राजकारणात कोणीच गॉडफादर नव्हता. त्यावेळी साताºयातील अनेक सामान्य कार्यकर्त्यांच्या जोरावर त्यांनी राजकारणात टिकण्याचा प्रयत्न केला. एकीकडे कुटुंबातील संघर्ष टोकावर असतानाच त्यांना भारतीय जनता पार्टीत गोपीनाथ मुंडे यांच्यामुळे प्रवेश केला. भाजपाच्या चिन्हावर निवडणूक लढवून त्यांना महसूल राज्यमंत्रिपद मिळविले. त्यानंतर १९९९ च्या विधानसभा निवडणुकीत त्यांच्यावर खुनाचा आरोप झाला. त्यात २२ महिने ते सर्वांपासून दूर गेले. या खटल्यातून निर्दोष मुक्त झाल्यानंतर त्यांनी सातारा नगरपालिकेत २००१ सातारा विकास आघाडी स्थापन करून पॅनेल टाकले. त्यावेळी सहानुभूतीच्या लाटेत सत्तारुढ नगर विकास आघाडीला केवळ १ नगरसेवक मिळाला. नगराध्यक्षांसह तब्बल ३६ नगरसेवकांची फौज घेऊन उदयनराजे यांनी सातारा शहरावर राज्य केलं. त्यानंतर त्यांना आमदार म्हणून संधी मिळाली.

उदयनराजे भोसले
खासदार, सातारा लोकसभा मतदारसंघ (वय : ५३)
तरुणाईच्या गळ्यातील ताईत म्हणून परिचीत
आई कल्पनाराजे भोसले, पत्नी दमयंतीराजे भोसले, मुलगा वीरप्रतापसिंहराजे, मुलगी नयनतारा
सातारा पालिका नगरसेवक
कृष्णा खोरे विकास महामंडळाचे उपाध्यक्ष
महसूल राज्यमंत्री

मी सर्व पक्षीय आहे...!
उदयनराजे यांचा राजकीय प्रवास हा कायम पक्षविरहित राहिला आहे. सर्व पक्षात मित्रांचा गोतावळा असल्यामुळे ते कधीच कोणत्या पक्षात अडकून राहिले नाहीत. सातारकरही पक्ष न बघता राजेंना मतदान करतात. जलमंदिर पॅलेस येथे झालेल्या पत्रकार परिषदेत राजेंनी सर्व खुर्च्या एकत्र करून आपण सर्वपक्षीय असल्याचं ठणकावलं होतं.

मोदी लाटेतही सामान्यांच्या मनावर अधिराज्य
राज्यात आणि केंद्रात कोणाचीही लाट आली तरी त्या लाटेचा कसलाच परिणाम साताºयात झाला नाही. उदयनराजेंचा मदत करण्याचा स्वभाव, कोणताही किचकट प्रश्न दबंग स्टाईलने सोडविण्याची कला, सातारकरांची नस ओळखून त्यांच्यासोबत राहण्याची वृत्ती याबरोबरच सर्वात महत्त्वाचं म्हणजे थेट तेरावे वंशज म्हणून सातारकरांशी असलेले त्यांचे नाते त्यांना कायम सहाय्यभूत ठरले आहे. नवीन आणलेल्या गाडीचे पूजन असो वा सेल्फीचा नाद असो, तरुणाईच्या हाकेला न्याय मिळवून देणारा नेता म्हणून ते सामान्यांपर्यंत कायम पोहोचले.
कायम चर्चेत राहण्याची लकब उदयनराजे यांना लाभली आहे. चर्चेत राहण्याचा योग्य ‘टायमिंग सेन्स’ उदयनराजे यांच्यामध्ये आहे. त्यामुळे कोणीही ठरवून उदयनराजे यांना बोलायला भाग पाडू शकत नाही, याचा अनुभव अनेकांना आलेला आहे. त्यांच्या मनातील प्रत्येक भाव त्यांच्या चेहºयावर झळकतो. गेल्या काही वर्षांत उदयनराजे यांच्या वादग्रस्त विधानांमुळे राष्ट्रवादी काँग्रेस चर्चेत राहिली. त्यांच्या हटके स्टाईलही राज्यात गाजली.