सातारा-जांभे बसची मागणी

सातारा : सातारा-जांभे बस सकाळी सव्वासहा वाजता तातडीने सुरू करावी, अशी मागणी परिसरातील नागरिकांनी केली आहे. जांभे हे सातारा तालुक्यातील दुर्गम भागातील गाव आहे. सातारा-जांभे ही बस सकाळी सव्वासात वाजता सुरू करावी, तसेच या गावासाठी मुक्कामी बसही सुरू करावी, अशी मागणी नागरिकांनी केली आहे.

..................................................................

फसवणुकीच्या घटनांत वाढ

सातारा : सध्या बहुतांश व्यवहार ऑनलाइन होत असून, यातून मोठ्या प्रमाणावर फसवणुकीच्या घटनांमध्ये वाढ झाली आहे. कोरोना व लॉकडाऊनमुळे सर्व क्षेत्रामध्ये संगणक क्रांती झाली आहे. गर्दी टाळून संसर्गाला आळा घालण्यासाठी शासनाकडूनही ऑनलाइन व्यवहारासाठी प्रोत्साहित केले जात आहे.

................................................

विक्रेत्यांचे अतिक्रमण

सातारा : मकर संक्रांतीचा सण जवळ आल्याने विविध वस्तू विक्री करणाऱ्या व्यावसायिकांचे शहरातील रस्त्यांवर अतिक्रमण वाढले आहे. मकर संक्रांतीच्या सणामध्ये वाणवसा, वाण लुटण्याच्या वस्तूंच्या खरेदी-विक्रीत लाखो रुपयांची उलाढाल होते. त्यामुळे या सणामध्ये व्यसाय करण्यासाठी हंगामी व्यावसायिक सज्ज झाले आहेत.

.........................................................

नागरिकांचा प्रतिसाद

सातारा : येथील भैरोबा डोंगरी ग्रुपच्या वतीने आयोजित करण्यात आलेल्या सातारा-सज्जनगड पदभ्रमंती उपक्रमाला नागरिकांचा उत्स्फूर्त प्रतिसाद मिळाला. दरवर्षी हा उपक्रम डोंगरी ग्रुपच्या वतीने आयोजित करण्यात येतो. या उपक्रमामुळे पदभ्रमंतीच्या निमित्ताने निसर्गात राहण्याची संधी मिळते.

...................

बळीराजावर संकट

खटाव : खटाव तालुक्‍यातील काही भागांत हलका ते मध्यम स्वरूपाचा पाऊस झाला. अवेळी पडणाऱ्या पावसामुळे पिकांचे मोठे नुकसान होण्याची शक्यता निर्माण झाली आहे. येथील शेतकरी कधी ढगाळ वातावरण, कधी गारठा, तर कधी पाऊस अनुभवत आहेत. त्यामुळे रबी हंगाम धोक्यात आला आहे. अवेळी पडणाऱ्या पावसामुळे शेतकऱ्यांच्या पोटात गोळा उठत असल्याचे चित्र आहे.

..............

कांदा रोपाचे दर तेजीत

सातारा : मागील तीन ते चार महिन्यांपासून कांद्याला मिळत असलेला दर शेतकऱ्यांना दिलासा देणारा ठरत असल्यामुळे जिल्ह्यातील शेतकऱ्यांचा कांदा लागवडीकडे कल वाढला आहे. परिणामी कांदा रोप अर्थात तरव्याची मागणी वाढल्यामुळे दर तेजीत आले आहेत. पूर्वी वाफ्यावर होणारी तरवा विक्री आता फुटावर केली जात आहे.

............................

वाहतुकीची कोंडी

सातारा : येथील मुख्य बाजारपेठेतील रस्त्यावर वाहतुकीची कोंडी होत असून, वाहनधारकांना त्रास सहन करावा लागत आहे. बाजारपेठेतील रस्ता अरुंद असल्याने दुपारी बारापर्यंत आणि सायंकाळी चारनंतर या रस्त्यावरून चारचाकी वाहनांच्या रहदारीला बंदी घालण्यात आली आहे.

...............

वाहनचालक त्रस्त

सातारा : पुणे-बंगळुरू महामार्गावर आणि वाडी येथील टोलनाक्यावर फास्ट टॅग असून, वाहतुकीची कोंडी ही रोजचीच बाब बनली असून, व्यवस्थापन मात्र याकडे डोळेझाक करीत असून, वाहनचालकांकडून संताप व्यक्त होत आहे. फास्ट टॅग यंत्रणा सुरळीत सुरू करण्याची मागणी वाहनचालकांतून होत आहे.

.........................

मोबाइल चोरटे सक्रिय

वाई : शहरात गेल्या काही दिवसांपासून मोबाइल चोरटे सक्रिय झाले आहेत. सध्या भाजीमंडई चोरट्यांच्या रडारवर आहे. भाजी खरेदी करण्यासाठी आलेल्या वाईकरांना मंडईतूनच मोबाइलविना परतावे लागत आहे.

........