काळजमध्ये राजे गटाचाच दबदबा

तरडगाव : फलटण तालुक्यातील काळज ग्रामपंचायत निवडणुकीत राष्ट्रवादी पुरस्कृत राजे गटाच्या जय मल्हार विकास पॅनलच्या आठ उमेदवारांनी विजय मिळवून ग्रामपंचायतीवर निर्विवाद सत्ता स्थापित केली. विरोधी गटाला केवळ एक जागा जिंकता आली.

संजय गाढवे, विठ्ठल काकडे, सावळाराम गाढवे, विठ्ठलराव गाढवे, हणमंतराव गाढवे, नामदेवराव गाढवे, भिकाजी करळे, दत्तोबा गाढवे, हणमंत गायकवाड, जेष्ठ नागरिक व तरुणांच्या सहभागातून उभारलेल्या जय मल्हार विकास पॅनलने विरोधी म्हाळसाक्रांत पॅनलचा पराभव करीत नऊपैकी आठ जागांवर उमेदवार विजयी केले. येथील लढत ही राष्ट्रवादीच्याच दोन्ही गटांत झाली. यामध्ये सत्ताधारी गटाकडून संजय गाढवे, विजय शिंदे, सुरेखा जाधव, संगीता देशमुख, जयश्री गाढवे, रामचंद्र डोंबाळे, नीता मोहिते, मंगल गाढवे हे उमेदवार विजयी झाले, तर विरोधी गटाकडून कैलास गाढवे हे एकमेव उमेदवार विजयी झाले.

निवडणुकीतील या विजयानंतर फटाक्यांची आतषबाजी व गुलालाची उधळण करीत आनंदोत्सव साजरा करण्यात आला. नवनिर्वाचित सदस्यांचे विधान परिषदेचे सभापती रामराजे नाईक-निंबाळकर, आमदार दीपक चव्हाण, जिल्हा परिषदेचे माजी अध्यक्ष संजीवराजे नाईक-निंबाळकर, आदी मान्यवर व ग्रामस्थांनी कौतुक केले.

फोटो : १९ सचिन गायकवाड

फलटण तालुक्यातील काळज येथील ग्रामपंचायत निवडणुकीत जय मल्हार विकास पॅनलने निर्विवाद वर्चस्व प्रस्थापित केल्यानंतर गुलालाची उधळण करीत जल्लोष केला.