दंगा करू नका, म्हणताच केला तलवार हल्ला

सातारा : ‘दंगा करू नका’, असे सांगितल्याच्या रागातून प्रतापसिंहनगर येथील भारत गंगाराम कांबळे यांच्यावर दोघांनी सोमवारी तलवारीने हल्ला केला. यामध्ये ते जखमी झाले असून, त्यांच्यावर जिल्हा शासकीय रुग्णालयात उपचार सुरू आहेत.

याबाबत पोलिसांनी दिलेली माहिती अशी, कांबळे व संशयित हे दि. २२ रोजी सायंकाळी ७ वा.च्या सुमारास प्रतापसिंहनगर येथे थांबले होते. संशयितांनी विनाकारण दंगा करायला सुरुवात केली. त्यांना दंगा करू नका, असे कांबळे यांनी त्यांना सांगितल्यानंतर वाद झाला. त्यातून संशयितांनी कांबळे यांना लाथाबुक्‍क्‍यांनी मारहाण केली. आता तुला सोडत नाही. मी इथला डॉन आहे, असे म्हणत बाळा सगट याने कांबळे यांच्या डोक्‍यात तलावारीने वार केला. यात कांबळे जखमी झाले. त्यांना तत्काळ जिल्हा शासकीय रुग्णालयात उपचारासाठी नेण्यात आले. याप्रकरणी प्रमोद ऊर्फ बाळा काशिनाथ सगट व यलाप्पा काशिनाथ सगट (दोघे रा. प्रतापसिंहनगर) यांच्यावर सातारा शहर पोलीस ठाण्यात खुनाच्या प्रयत्नाचा गुन्हा दाखल झाला आहे. सहायक पोलीस निरीक्षक चेतन मछले हे अधिक तपास करत आहेत.