लाॅकडाऊनमध्ये शेतरस्ते पुन्हा प्रकटले!

चाफळ : नानेगाव खुर्द (ता. पाटण) गावातील शेतकऱ्यांनी एकत्रित येत लाॅकडाऊन काळातील वेळ सत्कारणी लावला आहे. गावात लोकसहभागातून शेतरस्ते तयार करण्याचे काम गुढीपाडव्यापासून सुरु केले आहे. ‘गाव ते शेत पोहोच रस्ता’ ही योजना स्वत:च तयार करत ती यशस्वीपणे राबवली आहे.

सध्या शेतरस्ते तयार होत असल्याने शेतकऱ्यांच्या बांधापर्यंत थेट वाहन जाण्यास मदत झाली आहे. एकंदरीतच शेतापर्यंतचे रस्ते खुले झाल्याने येथील शेतकऱ्यांना आधुनिक शेती करणे फायद्याचे ठरणार आहे. त्यामुळे शेतकऱ्यांमधून समाधान व्यक्त करण्यात येत आहे.

नानेगाव खुर्द येथे शेतरस्ते गेली कित्येक वर्षे बंद होते. पावसाळा असो की उन्हाळा हे रस्ते खुले केले जात नव्हते. त्यामुळे शेतापर्यंत वाहन जाऊ शकत नव्हते. साहजिकच शेतीची प्रगती होत नव्हती. अशा परिस्थितीत मग करायचे तरी काय? असा प्रश्न येथील शेतकऱ्यांना सतावत होता. यावर रामबाण उपाय शोधत येथील काही शेतकऱ्यांनी पुढाकार घेत गावस्तरावर मोजके शेतकरी जमले. कोरोनाचे नियम पाळत बैठक घेतली. या बैठकीत गावातील प्रत्येक शेतापर्यंत रस्ते तयार करण्याची संकल्पना रुजवली गेली व ‘गाव ते शेत पोहोच रस्ता’ ही योजना शेतकऱ्यांनी तयार करुन ती यशस्वीपणे राबवलीही.

प्रत्येकाच्या शेतीपर्यंत पोहोच रस्ता हवा तरच शेतीची मशागत व इतर कामे व्यवस्थित व वेळेवर पार पडतील. रस्ते नसल्याने होणारी परवड पाहून लोकांनी सहकार्याची भूमिका पार पाडत सर्वानुमते गावातील सर्व शेतीला पोहोचतील, असे सर्व रस्ते खुले करण्याचा निर्णय गुढीपाढव्याच्या मुहूर्तावर घेण्यात आला. त्या दिवसापासूनच सर्व रस्ते खुले करण्यास सुरुवात केली. यामुळे शेतीची मशागत, शेणखत देणे, पेरणी इत्यादी कामे वेळीच आणि सुलभतेने होणार आहेत.

चौकट :

आधुनिक शेतीचं स्वप्न सत्यात उतरणार

चाफळपासून सहा किलोमीटरवर उत्तरमांड धरणाजवळ नाणेगाव खुर्द आहे. शिक्षकांचे गाव म्हणून परिचित असणाऱ्या या गावात साधारणत: १०० हेक्टर शेतजमिनीचे क्षेत्र आहे. या गावातील प्रत्येकाच्या शेतजमिनीपर्यंत जाण्यासाठी रस्ते नव्हते. पूर्वीचे हवेदावे बाजूला ठेवत येथील शेतकऱ्यांनी स्वत:च योजना तयार करत यशस्वीपणे राबवली. त्यामुळे आधुनिक शेतीचे स्वप्न सत्यात उतरण्यास मदत झाली आहे. व लाॅकडाऊन काळातील वेळेचा सदुपयोगही झाला आहे.

फोटो हणमंत यादव यांनी मंगळवारी २७ तारखेला पाठविला आहे.