नेरच्या पाण्याचा लाभ शेतकऱ्यांनी घ्यावा

खटाव : ‘नेर तलावातील पाणी साठ्यातून लाभक्षेत्रातील २८ गावांतील एकूण २ हजार ६३६ हेक्टर क्षेत्र ओलिताखाली येते. नेर तलाव पूर्ण क्षमतेने भरला आहे. उन्हाळी पिकाच्या शेती सिंचनासाठी हे पाणी उजव्या कालव्यात सोडण्यात आले आहे. नेर तलावाच्या शेती सिंचन क्षेत्रातील लाभार्थी शेतकऱ्यांनी पाणी सारा भरून सोडण्यात आलेल्या पाण्याचा लाभ घ्यावा,’ असे आवाहन पाटबंधारे विभागाचे उपविभागीय अभियंता सु. मो. खाडे यांनी केले.

खटावमधील शेतकऱ्यांना नेर तलावातील पाणी येरळा नदीत व दोन्ही कॅनॉलला सोडताना येत असलेल्या प्रमुख अडचणी तसेच ज्या शेतकऱ्यांनी अद्याप पाणीसारा भरला नसल्यामुळे पाटबंधारे विभागाला काही अडचणी येत आहेत. त्यासंदर्भात खाडे यांनी शेतकऱ्यांशी चर्चा केली. यावेळी सरपंच नंदकुमार वायदंडे, उपसरपंच अमर देशमुख, राहुल पाटील, अशोक कुदळे, किसन मोरे, उमेश भिसे, रमेश शिंदे, चरण बोबडे, दीपक घाडगे, कालवा निरीक्षक अमोल लेंभे, कालवा निरीक्षक शकील पठाण आदींसह नदीकाठचे सर्व विहीर, बोर मालक ग्रामपंचायत हॉलमध्ये उपस्थित होते.

यावेळी राहुल पाटील यांनी वेळेत पाणी सोडण्याचे नियोजन नसल्यामुळे शेतकरी नाराज आहेत. शेतकऱ्याला पाणीसारा भरूनही पाणी मिळाले नसल्यामुळे शेतकरी पाणी सारा भरावयास तयार नाहीत. अद्याप काही ठिकाणी कालव्याची दुरुस्ती करणे आवश्यक आहे आणि ते होत नसल्यामुळे पाणी गळतीचे प्रमाणही अधिक आहे. पाटबंधारे विभाग व स्थानिक स्वराज्य संस्थांमध्ये ताळमेळ व समन्वय नसल्यामुळे पाणी वाटपाचे योग्य ते नियोजन होत नसल्याचे सांगितले.

पाणी वाटप संस्था स्थापन करून शेतकऱ्यांनी पाण्याचे योग्य नियोजन करून पाणी वाटप करावे. शासनाच्या धोरणानुसार कालवा दुरुस्तीचे तसेच बंधाऱ्याची दुरुस्ती करण्याकरिता प्रस्ताव दिले असले, तरी जर सिंचन प्रकल्पात असलेल्या लाभार्थी शेतकऱ्यांकडून महसूल गोळा होत नसेल, तर दुरुस्ती खर्च करताना अडचणी येतात. त्यामुळे शासनाच्या धोरणानुसार पाणीसारा रूपात महसूल जमा करणे बंधनकारक असल्याचे खाडे यांनी सांगितले. शेतकऱ्यांनी पाणी सारा भरण्याची मानसिकता तयार केली पाहिजे, असे मत उमेश भिसे यांनी व्यक्त केले.

11खटाव

नेर तलावातील पाणी डाव्या कालव्यात व नदी पात्रात सोडण्यासंदर्भात झालेल्या बैठकीत बोलताना उपविभागीय अभियंता खाडे. यावेळी सरपंच नंदकुमार वायदंडे, राहुल पाटील आदींची उपस्थिती होती.