शिरवळ येथे दारू वाहतूक करणाऱ्यावर गुन्हा दाखल

शिरवळ : खंडाळा तालुक्यातील शिरवळ गावच्या हद्दीमध्ये बेकायदेशीररीत्या बिअर वाहतूक करणाऱ्या विक्रेत्यावर शिरवळ पोलिसांनी टाकलेल्या छाप्यात दुचाकी, ३६ बिअरच्या बाटल्यांसह २१ हजार १२० रुपयांचा मुद्देमाल जप्त केला आहे.

रोहित सुभाष सुर्वे (वय २६, रा. सोनाली गार्डन हॉटेल, दत्तनगर, शिरवळ ता. खंडाळा) असे बिअर वाहतूकदाराचे नाव आहे.

शिरवळ पोलिसांकडून मिळालेली माहिती अशी की, शिरवळ, ता. खंडाळा येथील पंढरपूर फाटा या ठिकाणी देशी-विदेशी दारूची वाहतूक होणार असल्याची माहिती शिरवळ पोलीस उपनिरीक्षक सागर अरगडे यांना मिळाली. त्यानुसार पोलिसांनी पंढरपूर फाटा येथील एका पुलाजवळ सापळा रचला असता त्या ठिकाणी विना नंबरप्लेट असणारी दुचाकी शिरवळ बाजूकडून येताना दिसली. पोलिसांनी थांबवली असता दुचाकीचालक रोहित सुर्वे हा बेकायदेशीररीत्या बिअरची वाहतूक करीत असल्याचे निदर्शनास आले. त्यानुसार शिरवळ पोलिसांनी त्याच्याकडून मुद्देमाल जप्त केला. या घटनेची फिर्याद जितेंद्र शिंदे यांनी शिरवळ पोलीस स्टेशनला दिली असून, अधिक तपास पोलीस हवालदार रवींद्र कदम हे करीत आहे.