पाचगणीत दुचाकी चोरटा जेरबंद

पाचगणी : दुचाकी चोरी करणाऱ्या आरोपीला पाचगणी पोलिसांनी अटक करून त्याच्याकडून मोटारसायकल हस्तगत केली. अमर चंद्रकांत गवळी (वय ३०, रा. जुने पाॅवर हाउस, ता. महाबळेश्वर) असे अटक करण्यात आलेल्या आरोपीचे नाव आहे.

पोलिसांनी दिलेल्या माहितीनुसार, पाचगणी येथील जुने पाॅवर हाउस येथील सार्वजनिक पार्किंगमधून दुचाकी (एमएच ११ बीजे ७३९९) ही अज्ञात चोरट्याने चोरून नेली. याबाबत महेश गणपत शेडगे (वय ३४) यांनी फिर्याद दिली होती. त्यानुसार पाचगणी पोलीस ठाण्यात गुन्हा दाखल करण्यात आला होता. गुन्ह्याच्या तपासात आरोपी अमर चंद्रकांत गवळी हा निष्पन्न झाला. पाचगणी पोलीस त्याचा शोध घेत असताना गोपनीय माहितीच्या आधारे आरोपी हा चोरीस गेलेली दुचाकीसोबत पाचगणीत येणार असल्याची माहिती पोलिसांना मिळाली. त्यानुसार दुचाकी चोरास वाईकडे जात असताना २१ फेब्रुवारी रोजी पहाटे पसरणी घाटात पाचगणी पोलिसांनी शिताफीने पकडले. त्याच्याकडील दुचाकी जप्त करून आरोपीस अटक करून प्रथम वर्ग न्यायदंडाधिकारी महाबळेश्वर यांच्यासमोर हजर केले असता त्याला पोलीस कोठडी देण्यात आली. ही कारवाई पोलीस अधीक्षक अजय बन्सल, अतिरिक्त पोलीस अधीक्षक धीरज पाटील, उपविभागीय पोलीस अधिकारी शीतल जानवे-खराडे, सहायक पोलीस निरीक्षक सतीश पवार यांच्या मार्गदर्शनाखाली पोलीस उपनिरीक्षक यशवंत महामुलकर, पोलीस नाईक नीलेश माने, जितेंद्र कांबळे, पोलीस काॅन्स्टेबल सागर नेवसे यांनी केली.