आगाशिवनगर भाजी मंडईत सोशल डिस्टन्सिंगचा फज्जा

मलकापूर : मलकापूर पालिकेने गर्दी होऊ नये म्हणून भाजी मंडईची चार ठिकाणे निश्चित केली. ठरवून दिलेल्या जागेतच नियमांचे पालन करून बसा, अन्यथा कारवाई, असा कडक इशाराही पालिका प्रशासनाने दिला होता. मात्र भाजी मंडईत प्रमाणापेक्षा जास्त विक्रेते बसत असून ग्राहकांचीही झुंबड उडत असल्यामुळे कऱ्हाड-ढेबेवाडी रस्त्यावर दोन तासात जणू जत्राच भरत आहे.

या जत्रेत विक्रेत्यांसह ग्राहक गळ्यात मास्क अडकवून गर्दी करतात. सोशल डिस्टन्सिंगसह नियमांचा फज्जा उडत आहे.

कोरोनाकाळात मलकापुरातील भाजी मंडई हा विषय कायमच वादाचा विषय बनला होता. कायम रस्त्यांवर व खासगी जागेतच मंडई भरत होती. त्यामुळे गर्दी होत होती. ही बाब विचारात घेऊन नगराध्यक्षा नीलम येडगे, उपनगराध्यक्ष मनोहर शिंदे, तत्कालीन मुख्याधिकारी संजीवनी दळवी यांच्यासह नगरसेवकांनी हा विषय कायमस्वरूपी मिटविण्यासाठी प्रयत्न केले.

आरक्षित जागेतील पुण्यश्लोक राजमाता अहिल्यादेवी होळकर यांच्यानावाने नवीन भाजी मंडई सुरू केली. मात्र आगाशिवनगर व जखिणवाडी रस्त्यांवरच भाजी मंडई भरत होती. कोरोनाचा प्रादुर्भाव विचारात घेता, मुख्याधिकारी राहुल मर्ढेकर यांच्यासह पालिका पदाधिकारी व अधिकाऱ्यांनी शहरात चार ठिकाणी मंडई भरवण्याचे ठरवले. याची अंमलबजावणीही त्यांनी तातडीने केली. मात्र त्या चार जागांवर गर्दी होणार नाही अशी विक्रेत्यांना बसण्याची सोय केली. तरीही नियम धाब्यावर बसवून कऱ्हाड-ढेबेवाडी रस्त्यालगतच्या फूटपाथवर १०५ विक्रेत्यांना परवानगी असताना, सध्या दीडशेहून अधिक विक्रेते गर्दी करत आहेत.

तसेच सकाळी दोन तासात ग्राहकही नाक-तोंड मोकळंच ठेवत मास्क गळ्याला अडकवून खरेदीसाठी गर्दी करत आहेत. सोशल डिस्टन्सिगसह कठोर निर्बंधाला केराची टोपलीच दाखवत आहेत.

चौकट

३२० विक्रेत्यांची सोय

नवीन भाजी मंडई ८५ विक्रेते

जुनी शिंगण यांच्या जागेत ७५ विक्रेते

कृष्णा रुग्णालय उत्तरेकडील भिंतीलगत १०५ विक्रेते

अरुण जाधव यांच्या जागेत ५५ विक्रेते

चौकट

लॉकडाऊनमुळे व्यवसायात बदल

लॉकडाऊन केल्यानंतर जीवनावश्यक वस्तूंच्या व्यवसायाव्यतिरिक्त इतर सर्व व्यवसाय बंद केले आहेत. अशा बंद व्यवसायातील कामगार उत्पन्नाचे साधन म्हणून जीवनावश्यक वस्तू विक्रीकडे वळले आहेत. त्यामुळे खरेदीदारांपेक्षा विक्रेत्यांचीच संख्या जास्त दिसत आहे.

चौकट

बाहेरील विक्रेत्यांची मुजोरी

स्थानिक व्यावसायिक लाखो रुपये भांडवल गुंतवून हजारो रुपये भाडे देऊन नियम पाळत वेळेत शटरडाऊन करतात. तर मलकापूरच्या बाहेरून येऊन बिनभाड्याच्या जागेत अनधिकृत व्यवसाय करणारेच नियमांचे उल्लंघन करत असल्याचे निदर्शनास आले आहे.

फोटो माणिक डोंगरे यांनी मेल केला आहे.

आगाशिवनगर येथी भाजी मंडईत विक्रेत्यांसह ग्राहक गळ्यात मास्क अडकवून गर्दी करत आहेत. (छाया : माणिक डोंगरे)