शहापूरमधून पाच शेळ्या चोरणारा गजाआड

मसूर : शहापूर ता. कऱ्हाड येथील पाच शेळ्या चोरल्याचा गुन्ह्याचा छडा मसूर पोलिसांनी अवघ्या चोवीस तासात लावला. फिल्मी स्टाईलने गुन्ह्यात वापरलेली कार व आरोपीस अटक केली. ही घटना गुरुवार, दि. २९ रोजी घडली. नईम सलीम मुल्ला (रा. ओगलेवाडी) अटक केलेल्याचे नाव आहे. अन्य दोघे जण पळून गेले आहेत.

याबाबत माहिती अशी की, फिर्यादी शरद शामराव आखाडे यांच्या तीन शेळ्या व बोकड, तसेच अकबर मुल्ला यांच्या दोन वर्षाचे बोकड असा एकूण १८ हजार रुपयांचे पाच बकरी चोरट्यांनी बुधवार, दि. २८ रोजी पहाटे साडेतीनच्या सुमारास, चोरून नेले होते. याबाबत मसूर पोलीस दूरक्षेत्रात गुन्हा दाखल झाला होता.

उंब्रजचे सहायक पोलीस निरीक्षक अजय गोरड यांना मिळालेल्या गोपनीय व तांत्रिक माहितीच्या आधारे गोरड यांच्या मार्गदर्शनाखाली मसूर दूरक्षेत्राचे उपनिरीक्षक प्रवीण जाधव, पोलीस नाईक राजेंद्र माने,

अमोल देशमुख, प्रशांत पवार यांनी ओगलेवाडीत जाऊन सापळा रचला. या गुन्ह्यात वापरलेली कारसह नईम सलीम मुल्ला यास फिल्मी स्टाईलने पकडले. यावेळी इतर दोन आरोपी पळून जाण्यात यशस्वी झाले. सहाय्यक फौजदार आबा जगदाळे तपास करीत आहेत.