लिफ्ट देणं दुचाकीस्वाराला भोवलं

सातारा : रस्त्यावरून जात असताना दोघांना लिफ्ट देणं दुचाकीस्वाराच्या अंगलट आले असून, संबंधित दोघांनी दुचाकीस्वाराला वाटेत थांबवून मारहाण केली, तसेच त्याच्याकडील रोकड आणि मोबाइल चोरून नेला. ही घटना १३ रोजी गणेशवाडी, ता. सातारा गावच्या हद्दीत घडली.

याबाबत अधिक माहिती अशी, विठ्ठल दादासो निकम (वय ४७, रा. दुटाळवाडी, ता. सातारा) हे १३ रोजी रात्री साठेआठच्या सुमारास नागठाणेहून घरी जात होते. यावेळी वाटेत दोन अनोळखींनी त्यांना थांबवले. आम्हाला दुटाळवाडी गावातच यायचे आहे, असे त्यांना सांगितले. त्यामुळे निकम यांनी त्या दोघांना ट्रीपलसिट दुचाकीवर घेतले. काही अंतर पुढे गेल्यानंतर गणेशखिंडीजवळील खडी क्रशरकडे जाणाऱ्या रस्त्यावर त्यांना गाडी थांबविण्यास सांगितली. गाडी थांबल्यानंतर दोन अनोळखी व्यक्तींनी निकम यांना खाली पाडून मारहाण करण्यास सुरुवात केली. त्यानंतर त्यांच्या खिशातील काही पैसे, मोबाइल आणि त्यांची दुचाकी घेऊन चोरट्यांनी पलायन केले. या घटनेनंतर त्यांनी हा घडलेला प्रकार काही नागरिकांना सांगितला. त्यानंतर त्यांनी बोरगाव पोलीस ठाण्यात याची माहिती दिली. बोरगाव पोलिसांनी दोन अनोळखी व्यक्तींवर जबरी चोरीचा गुन्हा दाखल केला आहे. याबाबत अधिक तपास सहायक पोलीस निरीक्षक सागर वाघ करीत आहेत.