महिला कोरोना योद्धयांचा गौरव

सातारा जिल्हा शिवसेना महिला आघाडीच्यावतीने खंडाळा येथे जागतिक महिला दिनानिमित्त कोरोना योद्धा महिलांचा सत्कार कोरोनाचे सर्व नियम पाळून करण्यात आला. यावेळी शिवसेना जिल्हाप्रमुख यशवंत घाडगे, महिला आघाडीच्या प्रमुख शारदा जाधव, उपजिल्हाप्रमुख अजित यादव, पोलीस उपनिरीक्षक वृषाली देसाई, कल्पना पवार, शहरप्रमुख बापूराव गाढवे यांसह प्रमुख उपस्थित होते.

‘महिला सबलीकरणासाठी शिवसेना नेहमी कार्यरत राहिली आहे. राजकारणात महिलांना अर्धा वाटा मिळाल्याने विविध क्षेत्रात महिला ताठ मानेने काम करीत आहेत. योजना राबविण्यासाठी आम्ही प्रयत्नशील आहोत. कोरोनाच्या काळात महिला कर्मचाऱ्यांचे योगदान मोठे आहे. त्यांचा सन्मान करण्याचे भाग्य लाभल्याचे समाधान वाटते,’ असे मत महिला आघाडीच्या प्रमुख शारदा जाधव यांनी व्यक्त केले.

‘प्रत्येकाने महिलाचा सन्मान करणे गरजेचे असून, आज सर्वच क्षेत्रात महिला पुरुषाच्या खांद्याला खांदा लावून काम करीत आहे. आगामी काळात शिवसेनेच्या माध्यमातून महिलांचे प्रश्न सोडविण्यासाठी प्रयत्नशील राहणार आहोत,’ असे जिल्हाप्रमुख यशवंत घाडगे यांनी स्पष्ट केले.

यावेळी सर्व महिलांचा सन्मानपत्र व तुळशीचे रोप देऊन सत्कार करण्यात आला.