कांद्यामुळे शेतकऱ्यांसाठी अच्छे दिन...

सातारा : जिल्ह्यात कांद्याची आवक कमी असून सातारा बाजार समितीत तर ४५०० रुपये क्विंटलपर्यंत दर आला. यामुळे शेतकऱ्यांना अच्छे दिन येऊ लागले आहेत. तर भेंडी अन् शेवग्याचाही भाव तेजीत आहे. मात्र, कोबी, टोमॅटो व फ्लॉवरला दर कमीच मिळत आहे.

सातारा बाजार समितीत जिल्ह्यातील विविध ठिकाणांहून शेतीमाल येतो. तसेच पुणे आणि सोलापूर जिल्ह्यातूनही काही प्रमाणात आवक होते. यामध्ये कांदा आणि बटाटा अधिक प्रमाणात येतो.

सातारा बाजार समितीत बुधवारी कांद्याला क्विंटलमागे १०० रुपयांची वाढ झाली होती. त्यामुळे दर ४५०० रुपये क्विंटलपर्यंत गेला. तर हलक्या प्रतिच्या कांद्याला २ हजारापर्यंत भाव आला. यामुळे कांदा महाग होऊ लागल्याचे दिसत आहे. साताऱ्यातील मंडई तसेच दुकानातही कांदा विक्रीचा दर ६० रुपयांच्या पुढे पोहोचला आहे. यामुळे सामान्यांच्या खर्चात वाढच झाली आहे.

सातारा बाजार समितीत बुधवारी ५५ वाहनांतून ३७८ क्विंटल फळभाज्यांची आवक झाली. यामध्ये कांद्याची २४७ क्विंटलची आवक झाली. तर बटाटा ४१, लसूण १६ आणि आल्याची ९ क्विंटलची आवक झाली. तसेच फळांचीही काही प्रमाणात आवक झाली. बाजार समितीत गवारला १० किलोस ५०० ते ६०० रुपये दर मिळाला. रविवारच्या तुलनेत दरात सुधारणा झाली. तसेच शेवगा शेंगेला ४०० ते ५०० रुपये भाव आला. शेवगा शेंगेच्या दरात वाढ झाली आहे. तर वांग्याला १० किलोला १५० ते २०० रुपये दर मिळाला. टोमॅटो ५० ते ७०, कोबीला २० ते ३० रुपये भाव आला. टोमॅटो व कोबीला दर अजूनही कमीच मिळत आहे. तर फ्लॉवरला १० किलोला १०० ते १५० अन् दोडक्याला ३०० ते ४०० रुपये दर आला.

बटाट्याला क्विंटलला ७०० पासून १५०० रुपयांपर्यंत दर मिळाला. हिरव्या मिरचीला क्विंटलला २५०० ते ३ हजार रुपयांपर्यंत भाव आला. आल्याला १७०० रुपयांदरम्यान दर मिळाला. लसणाला क्विंटलला ३ ते ७ हजारांपर्यंत भाव आला. वाटाणा अजूनही स्वस्त आहे. ३५०० रुपयांपर्यंत क्विंटलला दर मिळाला.

चौकट :

पालेभाज्यांची आवक जेमतेम...

सातारा बाजार समितीत बुधवारी पालेभाज्यांची आवक जेमतेम झाली. पण, मागील आठवड्याचा विचार करता दरात चढ-उतार होता. मेथीच्या १३०० पेंड्यांची आवक झाली. याला शेकडा ३०० ते ६०० रुपये दर मिळाला. तर कोथिंबीरची १२०० पेंडी आली. याला शेकडा दर ४०० ते ५०० रुपयांदरम्यान मिळाला. तर पालकला शेकडा ४०० ते ५०० रुपये भाव आला.

......................................................