कऱ्हाडात बाबासाहेब आंबेडकर यांना अभिवादन

कऱ्हाड येथे पालिकेनजीक भारतरत्न डॉ. बाबासाहेब आंबेडकर यांचा पूर्णाकृती पुतळा आहे. दरवर्षी जयंतीनिमित्त शहरात विविध कार्यक्रमांचे आयोजन केले जाते. पुतळा परिसरात मोठे स्टेज उभारून त्याची सजावट केली जाते. तसेच सायंकाळी मिरवणूकही काढण्यात येते. मात्र, यंदा कोरोनामुळे सर्व सामाजिक कार्यक्रम रद्द करण्यात आले. अनेकांनी पूर्णाकृती पुतळ्यास पुष्पहार अर्पण करून अभिवादन केले. डॉ. आंबेडकर यांच्या १२७ व्या जयंतीनिमित्त सहकार व पणन तथा पालकमंत्री बाळासाहेब पाटील यांनीही अभिवादन केले. तसेच माजी मुख्यमंत्री आमदार पृथ्वीराज चव्हाण यांनीही पुतळ्यास पुष्पहार अर्पण करून अभिवादन केले. यावेळी नगरसेवक डॉ. इंद्रजित गुजर, माजी नगराध्यक्ष फारूख पटवेकर, अशोकराव पाटील यांच्यासह पदाधिकारी, कार्यकर्ते, नागरिक उपस्थित होते. पालिकेच्यावतीने नगराध्यक्षा रोहिणी शिंदे यांनीही पुतळ्याला अभिवादन केले.

दरम्यान, आमदार पृथ्वीराज चव्हाण यांच्या निधीतून पालिकेला देण्यात आलेल्या नवीन रुग्णवाहिकेचा लोकार्पण सोहळा आमदार प्रकाश चव्हाण यांच्या हस्ते पार पडला. यावेळी पालिकेचे पदाधिकारी व अधिकारी उपस्थित होते.

फोटो : १४केआरडी०२

कॅप्शन : कऱ्हाड येथे डॉ. बाबासाहेब आंबेडकर यांच्या पुतळ्याला पुष्पहार अर्पण करून जयंतीदिनी अभिवादन करण्यात आले. यावेळी माजी मुख्यमंत्री आमदार पृथ्वीराज चव्हाण, इंद्रजित गुजर, फारूख पटवेकर, अशोकराव पाटील आदी उपस्थित होते.