ट्रॅक्टरमधून पडून मृत्यू झालेल्याची ओळख पटली

सातारा : ट्रॅक्टरमधून पडून मृत्यू झालेल्या व्यक्तीची पोलिसांना ओळख पटली असून, संबंधित व्यक्ती बीड जिल्ह्यातील वैजनाथ परळीमधील असल्याचे समोर आले आहे. मात्र, संबंधित व्यक्तीच्या पत्नीने पतीचा घातपात झाल्याची शक्यता वर्तविल्याने खळबळ उडाली आहे.

सुनील दत्ता कांबळे (४०, सध्या रा. कुमठे फाटा, सातारा, मूळ रा. वैजनाथ परळी, बीड) असे अपघातात ठार झालेल्या व्यक्तीचे नाव आहे. याबाबत अधिक माहिती अशी, सोमवारी रात्री साडेअकरा वाजता १०८ रुग्णवाहिकेने एका व्यक्तीला मृत अवस्थेत जिल्हा रुग्णालयात दाखल केले. मात्र, संबंधित रुग्णवाहिकेच्या कर्मचाऱ्यांनी त्याचा अपघात नेमका कुठे झाला, हे सांगितले नव्हते. त्यामुळे अपघातात ठार झालेल्या व्यक्तीची ओळख पटवणे पोलिसांना अवघड झाले होते. दरम्यान, मंगळवारी सकाळी अपघातात ठार झालेली व्यक्ती सुनील कांबळे असल्याचे त्यांच्या पत्नीने ओळखले. मात्र, त्यांचा अपघात झाला नसून कोणीतरी त्यांना मारले असल्याचे पत्नीचे म्हणणे आहे. यामुळे या प्रकरणाचे गूढ वाढले आहे. सुनील कांबळे हे शेतमजुरीच्या कामासाठी कोरेगावमध्ये आले होते. त्यांचा अपघात कोरेगाव तालुक्यातील कुमठे येथे झाल्यामुळे या अपघाताची नोंद कोरेगाव पोलीस ठाण्यात होणार असल्याचे जिल्हा रुग्णालयातील पोलिसांनी सांगितले.