सातारा शहरात जोरदार पाऊस, नागरिकांची उडाली धांदल; गणेश मंडळाच्या भव्य-दिव्य देखाव्याचे नुकसान

गणेश मंडळाकडून उभारण्यात आलेले भव्य-दिव्य देखाव्याचे नुकसान झाले

सातारा : गेल्या अनेक दिवसांपासून विश्रांती घेतलेल्या वरूणराजाने आज, मंगळवारी दुपारी सातारा शहर व परिसराला झोडपून काढले. मुसळधार पावसामुळे शहरातील ओढे, नाले तुडुंब भरून वाहू लागले तर विक्रेते व खरेदीसाठी घराबाहेर पडलेल्या नागरिकांची चांगलीच धांदल उडाली.

शहरात मंगळवारी सकाळपासूनच ढगाळ वातावरण होते. दुपारी बारानंतर पावसाचा एक- दोन सरी बरसल्या. यानंतर पावसाने उघडीत दिली. मात्र, दोन वाजण्याच्या सुमारास पावसाने सर्वदूर जोरदार हजेरी लावली. विजेचा कडकडाट व वेगवान वाऱ्यासह झालेल्या पावसामुळे शहरातील रस्ते जलमय झाले. ओढे, नाले तुडुंब भरून वाहू लागले. गणेश मंडळाकडून उभारण्यात आलेले भव्य-दिव्य देखावे देखील या पावसात भिजल्याने नुकसान झाले आहे.