इचलकरंजीत नळ मीटरच्या चौकशीचे आदेश

नावे कळविण्याचे निर्देश : संबंधितांकडून ५८ लाख रुपयांच्या वसुलीच्या शक्यतेने नगरपालिकेमध्ये खळबळ

इचलकरंजी : साधारणत: आठ वर्षांपूर्वी खरेदी करण्यात आलेली नगरपालिका पाणीपुरवठा विभागाकडील नळ मीटर प्रकरणी जिल्हाधिकारी अमित सैनी यांनी चौकशीचे आदेश दिले आहेत. अठ्ठावीस लाख रुपयांची ही मीटर असून, या प्रकरणातील अनियमितपणास जबाबदार अधिकारी, कर्मचारी आणि पदाधिकारी यांची नावे कळविण्याचे निर्देशही त्यांनी मुख्याधिकाऱ्यांना दिले आहेत. त्यामुळे तत्कालीन नगराध्यक्ष, पाणीपुरवठा सभापती, जलअभियंता, आदींकडून व्याजासह ५८ लाख रुपयांची वसुली होण्याची शक्यता असल्याने येथील नगरपालिकेमध्ये खळबळ उडाली आहे.
सन २००८ मध्ये तत्कालीन नगराध्यक्षांच्या हुकूमाने शहरातील नळांना जलमापन यंत्रे (मीटर) बसविण्याची निविदा मागविण्यात आली होती. या निविदाप्रकरणी भंवरलाल चांदमल लोहिया, लक्ष्मी पॅकेजिंग, कापड मार्केट, इचलकरंजी या कंपनीकडून पाच हजार मीटर खरेदी करण्यात आले. क्रांती कंपनीची मीटर नगरपालिकेच्या भांडाराकडे जमा करून त्यावर वेळोवेळी धनादेशही घेण्यात आले होते. हे मीटर अत्यंत हलक्या दर्जाचे असल्यामुळे त्याबाबत अधिक चौकशी करण्यासाठी येथील एक सामाजिक कार्यकर्ते दिलीप माणगावकर यांनी माहितीच्या अधिकाराखाली माहिती मागितली असता या निविदा प्रकरणातील बोगसगिरी लक्षात आली, असे माणगावकर यांनी पत्रकारांशी बोलताना सांगितले.
ते म्हणाले, मीटर खरेदी करताना मीटरवर ५४० रुपये इतकी कमाल किंमत असूनसुद्धा हे मीटर ७४० रुपयांप्रमाणे खरेदी केली. त्यावेळी निविदाधारकाने मीटरचा पुरवठा करताना टप्प्याटप्प्याने केला आणि त्याच पद्धतीने टप्प्याटप्प्यानेच मीटरची किंमत पालिकेकडून धनादेशाद्वारे घेतली.
या खरेदी प्रकरणात जिल्हा दर सूचीचे पत्र बोगस जोडण्यात आले होते, तर १५ एमएम बी क्लास अशा वर्णनाची मीटर पाहिजे असल्याची नोंद निविदेत असताना १५ एमएम ए क्लास या प्रतीच्या मीटरची तुलना करून या मीटरसाठी जादा दर घेण्यात आला.
मीटर ही पूर्णपणे प्लास्टिक फायबरची असून, त्यावर धातूचा मुलामा चढविण्यात आला आहे. मात्र, हे मीटर तकलादू असल्याने त्याच्यामध्ये लवकरच बिघाड होऊ लागले. मीटर घेतल्यानंतर एका साध्या कागदावर त्याचे बिल मागणी करण्यात आले. या कागदावर विक्रीकर नोंदणी नसल्याने निविदाधारकाने त्याचा करही अदा केला नाही.
अशा प्रकारे पूर्णपणे बोगसगिरी करून अठ्ठावीस लाख रुपयांची नगरपालिकेची लूट झाल्याबद्दल माणगावकर यांनी गेले वर्षभर जिल्हाधिकाऱ्यांकडे तक्रार केली आहे. त्यांच्या पाठपुराव्याला यश आले असून, या प्रकरणाबाबत जिल्हाधिकाऱ्यांनी नगरपालिकेकडे लेखी पत्र नुकतेच पाठविले आहे आणि या प्रकरणातील अनियमिततेस जबाबदार असणाऱ्या अधिकारी-कर्मचारी आणि पदाधिकारी यांची नावे कळविण्याचे निर्देश नगरपालिकेचे मुख्याधिकारी डॉ. प्रशांत रसाळ यांना दिले आहेत, असेही दिलीप माणगावकर यांनी स्पष्टपणे सांगितले. (प्रतिनिधी)


चुकविलेल्या विक्रीकराची वसुली
पाणी मीटर खरेदी प्रकरणात शासनाचा विक्री कर बुडविल्याबद्दल विक्रीकर खात्याकडे माणगावकर यांनीच तक्रार केली होती. त्या तक्रारीवरून विक्रीकर विभागाने या प्रकरणातील मक्तेदार भंवरलाल लोहिया यांचा पत्ता मिळावा, अशी मागणी तत्कालीन मुख्याधिकारी त्र्यंबक ढेंगळे-पाटील यांच्याकडे केली होती. लोहिया यांचा पत्ता मिळताच विक्रीकर विभागाच्या अधिकाऱ्यांनी लोहिया यास विक्रीकर चुकवेगिरीबद्दल व्याजासह अठरा लाख रुपयांची नोटीस काढली. दरम्यान, लोहिया इचलकरंजीतून परांगदा झाले होते. मात्र, त्यांना कर्नाटकातून शोधून त्यांच्याकडून बारा लाख रुपये वसूल केल्याचेही माणगावकर यांनी पत्रकारांना सांगितले.