मार्चपर्यंत ५० टक्के थकबाकी भरल्यास उर्वरित माफ

सातारा : कृषिपंप वीजजोडणी धोरण २०२० मधून कृषिपंपाच्या वीजबिलांच्या थकबाकीमध्ये तब्बल ६६ टक्के सूट देण्यात येत आहे. या योजनेनुसार येत्या मार्चपर्यंत यातील ५० टक्के रक्कम व चालू वीजबिल भरल्यास उर्वरित ५० टक्के थकीत रक्कम माफ होणार आहे,’ माहिती महावितरणच्यावतीने देण्यात आली आहे.

या योजनेत चालू वीजबिलांचा भरणा नाही अशा शेतकऱ्यांच्या कृषिपंपांचा वीजपुरवठा खंडित करण्याची कारवाई करण्यात येणार आहे. जिल्ह्यातील ९० हजार ६६२ शेतकऱ्यांनी थकबाकीमुक्त योजनेत सहभाग नोंदविला आहे. यामध्ये त्यांनी थकबाकीपोटी ९६ कोटी ५४ लाख व चालू वीजबिलांच्या ६८ कोटी ७६ लाख रुपयांचा भरणा केला आहे. त्यामुळे त्यांना भरलेल्या रकमेएवढी सूट, महावितरणकडून निर्लेखनद्वारे मिळालेली सूट तसेच विलंब आकार व व्याजातील सूट अशी एकूण १३५ कोटी ७१ लाख रुपये माफ झाले आहेत. यामध्ये ५१ हजार ६३३ शेतकरी वीजबिलांमधून संपूर्णपणे थकबाकीमुक्त झाले आहेत. त्यांनी चालू वीजबिल व थकबाकीच्या ५० टक्के रकमेचे एकूण ८३ कोटी ३४ लाख रुपयांचा भरणा केला आहे. तर ६५ कोटी ७७ लाख रुपयांची अतिरिक्त सूट घेऊन संपूर्ण थकबाकीमुक्ती मिळविली आहे.

चौकट :

कृषिपंप वीजजोडणी धोरणाची गावागावांमध्ये जनजागृती करून महावितरणकडून शेतकऱ्यांना वीज बिलातून थकबाकीमुक्त होण्याची आवाहन करण्यात येत आहे. यासाठी शेतकऱ्यांकडे असलेल्या एकूण थकबाकीमधील तब्बल ६६ टक्के रक्कम माफ होणार आहे. या योजनेत सहभागी होण्यासाठी शेतकऱ्यांनी कृषिपंपांच्या वीजबिलांचे किमान चालू वीजबिलांचा भरणा करणे आवश्यक आहे. तसेच भरलेल्या थकीत व चालू बिलांच्या रकमेतील ६६ टक्के रक्कम ही ग्रामपंचायत व जिल्ह्यातील ग्रामीण वीज वितरण यंत्रणेच्या पायाभूत विकासासाठी खर्च करण्यात येत आहे.

पॉइंटर :

जिल्ह्यात १ लाख २९ हजार २४८ कृषिपंपधारक

शेतकऱ्यांकडे १२१ कोटी ६ लाखांचे वीजबिल

५९९ कोटी ४३ लाख रुपयांची सुधारित थकबाकी

................