कोयनेच्या पाणीसाठ्यात एक टीएमसीने वाढ

सातारा : जिल्ह्यात तीन दिवसांपासून चांगला पाऊस होत असून, पश्चिम भागातील नवजा येथे सर्वाधिक ७९ मिलिमीटरची नोंद झाली, तर महाबळेश्वरला ४१ व कोयनानगर येथे ५४ मिलिमीटर पाऊस झाला. कोयना धरणात २४ तासांत जवळपास एक टीएमसीने वाढ होऊन साठा ९६.११ टीएमसीवर पोहोचला. दरम्यान, पूर्व दुष्काळी भागातही अनेक ठिकाणी चांगला पाऊस होत आहे.

जिल्ह्यात जुलै महिन्याच्या मध्यावर जोरदार पाऊस झाला होता. त्यावेळी पश्चिम भागात तर धुवाधार पावसामुळे जनजीवन विस्कळीत झाले होते. रस्ते वाहून गेले होते. तसेच जमिनी तुटल्या होत्या, तर अवघ्या तीन दिवसांत कोयना, नवजा आणि महाबळेश्वरला विक्रमी पाऊस झाला होता. त्याचबरोबर कोयना धरणात इतिहासात प्रथमच मोठ्या प्रमाणात पाण्याची आवक झाली. मात्र, ऑगस्ट महिन्यात एकदम कमी प्रमाणात पाऊस पडला. त्यामुळे धरणे पूर्णपणे भरलीच नाहीत. तर पूर्वेकडील खरीप हंगामातील पिके पावसाअभावी वाळू लागली होती. त्यामुळे धरणे भरणार का? अशी चिंता लागली होती. पण, गेल्या काही दिवसांपासून संपूर्ण जिल्ह्यात पावसाळी वातावरण तयार झाले आहे. अनेक ठिकाणी दमदार पाऊस होत आहे.

बुधवारी सकाळपर्यंतच्या २४ तासांत कोयना येथे ५४ मिलिमीटर पावसाची नोंद झाली; तर जून महिन्यापासून ३७६८ मिलिमीटर पाऊस पडला आहे. महाबळेश्वरला आतापर्यंत ५०२०, तर नवजाला ५०७३ मिलिमीटर पावसाची नोंद झालेली आहे.

दरम्यान, पूर्व भागातील माण, खटाव आणि फलटण या तालुक्यांतही अनेक ठिकाणी चांगला पाऊस होऊ लागला आहे. यामुळे खरीप हंगामातील पिकांना फायदा होत आहे. या पावसामुळे शेतकऱ्यांत आनंदाचे वातावरण तयार झाले आहे.

चौकट :

प्रमुख धरणांत समाधानकारक साठा...

जिल्ह्याच्या पश्चिम भागात प्रमुख आणि मोठी धरणे आहेत. या धरण परिसरत पाऊस सुरू झाला आहे. त्यामुळे धरणांत समाधानकारक पाणीसाठा उपलब्ध आहे. कोयना धरणात ९६.११ टीएमसी साठा असून, टक्केवारी ९१ च्यावर गेली आहे. धोम धरणात ८८, कण्हेरमध्ये ९०, उरमोडी धरणात ८३, बलकवडी ९६ आणि तारळी धरणात ९१ टीएमसीच्या आसपास पाणीसाठा झाला आहे.

............................................................