‘कचरा’ हद्दपार करण्याची वेळ आली

सातारा : ‘सत्ताधारी थापांचा पाऊस पाडण्यात माहीर असले तरी, हा तर केवळ निवडणुकीचा मोसमी पाऊस आहे, हे सातारकर ओळखून आहेत. त्यामुळे पालिकेतील ‘कचरा’ हळूहळू हद्दपार करण्याची वेळ जवळ आली आहे, असा उपरोधिक टोला आ. शिवेंद्रसिंहराजे भोसले यांनी लगावला आहे.

याबाबत प्रसिद्धीस दिलेल्या पत्रकात नमूद केले आहे की, परवाच निवडणूक आयोगाने प्रभाग रचनेसंदर्भात सूचना काढल्याने सत्ताधाऱ्यांनी विकासकामांचा पाऊस दाखवून नागरिकांना भुलवण्याचा उद्योग सुरू केला आहे. निवडणूक आयोगाने सूचना थोडी उशिरा काढली असती तर सातारकरांना हा थापेबाजी पाऊस आज दिसला नसता, हा कथित विकासकांचा पाऊसही लांबला असता. सत्ताधारी नेत्यांनी पत्रकबाजी करून पाडलेला पाऊस हा निवडणुकीचा मोसम आल्यानेच पडला आहे, हे सातारकर जनता चांगलीच ओळखून आहे. आपल्या कार्यकाळात सत्ताधाऱ्यांनी कमिशन आणि टक्केवारीसाठी एकमेकांची गचुंडी धरली, घरकुल योजना, घनकचरा प्रकल्प, घंटागाडी अशा सर्वच कामांमध्ये भ्रष्टाचार झाला.

हद्दवाढ होऊन आता वर्षभराचा कालावधी लोटला, पण हद्दवाढीतील नवीन भागासाठी एकही काम सत्ताधाऱ्यांनी केलं नाही. कोरोना महामारीचा विळखा बसला असताना साधं एक आयसोलेशन सेंटर सुरू केलं नाही. नेहमीसारखं सत्ताधारी नगरसेवक आणि मर्जीतल्या ठेकेदारांचे खिसे भरून स्वत:ची तुंबडी भरण्याचा उद्योग होणार नाही, याची दक्षता नेत्यांनी घ्यावी एवढीच माफक अपेक्षा आहे, असेही आ. शिवेंद्रसिंहराजे यांनी पत्रकात म्हटले आहे.

(चौकट)

विकासकामांचा दुष्काळ

अन् भ्रष्टाचाराचा सुकाळ

शहराचा विकास होईल या अपेक्षेने सातारकरांनी एकहाती सत्ता दिली, पण सातारकारांचा मोठा अपेक्षाभंग झाला. सातारा पालिकेत कमिशन आणि टक्केवारीसाठी एकमेकांचे गळे धरण्याच्या ऐतिहासिक घटना सातारकरांना पाहाव्या लागल्या. आता निवडणूक जवळ आल्याने विकासकामांचा पाऊस भासवण्याचा केविलवाणा प्रयत्न केला जात असून सत्ताधाऱ्यांनी केवळ भ्रष्टाचाराचा सुकाळ केला, असा घणाघातही आ. शिवेंद्रसिंहराजे भोसले यांनी केला.

फोटो : शिवेंद्रसिंहराजे