Satara: शिरसवडीच्या जवानाचे लखनऊमध्ये निधन, गावात शोककळा 

आज, शनिवारी शिरसवडीत होणार शासकीय इतमामात अंत्यसंस्कार

रशिद शेख 

औंध : खटाव तालुक्यातील शिरसवडी येथील जवान प्रवीणकुमार सुरेश इंगळे (वय ४०) यांचे लखनऊ येथे निधन झाले. प्रकृती अस्वास्थ असल्याने तेथील रुग्णालयात त्यांच्यावर उपचार सुरु होते. उपचारादरम्यान त्यांचा मृत्यू झाला. जवान इंगळे यांच्या निधनाचे वृत्त समजताच खटाव तालूक्यासह शिरसवडी गावावर शोककळा पसरली.

प्रवीणकुमार इंगळे हे गेली २२ वर्षे भारतीय सैन्यदलात सेवा बजावित होते. त्यांचे प्राथमिक शिक्षण शिरसवडी येथे झाले होते. सात ते आठ महिन्यापूर्वी ते गावी आले असताना त्यांचा अपघात झाला होता. त्यानंतर पुणे येथे उपचार घेऊन ते लखनऊला हजर झाले होते. 

काल, गुरुवारी त्यांना त्रास जाणवू लागल्याने तेथील रुग्णालयात उपचार घेत असताना त्यांचा मृत्यू झाला. आज, शनिवारी शिरसवडी येथे शासकीय इतमामात त्यांच्यावर अंत्यसंस्कार करण्यात येणार आहेत. त्यांच्या पश्चात आई, पत्नी, एक मुलगा, दोन भाऊ असा परिवार आहे.