जीपचालकावर हल्ला, महामार्गावर थरार !

शिरवळ : लगडवाडी (ता. वाई) येथून जीपमधून घर साहित्य भरून मुंबईकडे निघालेल्या जीपचालकासह दोघांना बांबूने मारहाण करीत जीपचे नुकसान केल्याप्रकरणी कारमधील अज्ञात पाचजणांविरुद्ध शिरवळ पोलीस स्टेशनला गुन्हा दाखल करण्यात आला आहे. या घटनेमुळे काही काळ आशियाई महामार्गावर तणावाची व गोंधळाची परिस्थिती निर्माण झाली होती.

याबाबत शिरवळ पोलिसांनी दिलेली अधिक माहिती अशी की, लगडवाडी येथील मनोहर यशवंत पवार हे जीप (एमएच ११ सीएच-००६०) मधून गोविंद मानसिंग कदम यांचे घर साहित्य घेऊन मुंबईला निघाले होते. दरम्यान, जीपचालक मनोहर पवार हे केसुर्डी गावच्या हद्दीमध्ये आले असता त्याठिकाणी पाठीमागून आलेल्या कारमधील तोंडाला कापड बांधलेल्या अवस्थेतील पाचजणांनी अचानकपणे जीपवर काठीने हल्ला चढविला.

यामध्ये जीपची काच फुटून चालक मनोहर पवार यांना समोरील बाजूचे दिसणे बंद झाले असता मनोहर पवार यांनी शिरवळ गावच्या हद्दीमध्ये एका हॉटेललगत महामार्गाच्या कडेला जीप लावली. यावेळी कारमधील अज्ञात व्यक्तींनी खाली उतरत मनोहर पवार व जीपमधील गोविंद कदम यांना मारहाण केली. त्यानंतर त्यांनी घटनास्थळावरून पलायन केले. या घटनेमुळे काही काळ महामार्गावर तणावाची व गोंधळाची परिस्थिती निर्माण झाली होती.

या घटनेची फिर्याद मनोहर पवार यांनी शिरवळ पोलीस स्टेशनला दिली असून अधिक तपास सहायक पोलीस उपनिरीक्षक पांडुरंग हजारे हे करीत आहे.