शिवभक्त प्रतिष्ठानने जोपासली सामाजिक बांधिलकी

उंब्रज : सामूहिक संकटे येतात आणि जातात. या संकटकाळात मदत करण्यासाठी समाजातील काही घटक तेवढ्याच ताकदीने समोर येतात. माणुसकी जपतात. त्यापैकी एक म्हणजे येथील शिवभक्त प्रतिष्ठान. लोकांच्या मदतीतून पूरग्रस्तांना लाखों रुपयांची मदत करणारे हे शिवभक्त कोरोना काळात ही मागे राहिलेले नाही. तर त्यांनी उंब्रज व परिसरातील गरजू कोरोनाग्रस्त व त्यांच्या कुटुंबीयांना स्व खर्चाने जेवण देण्याचा उपक्रम सुरू केला आहे.

येथील शिवभक्त प्रतिष्ठानच्या माध्यमातून सामाजिक उपक्रम नेहमीच राबवले जातात. दोन वर्षांपूर्वी कोल्हापूर जिल्ह्यात जाऊन तेथील पूरग्रस्तांना उंब्रज मधील नागरिक, व्यावसायिक व शिवभक्त प्रतिष्ठानचे सदस्य यांनी जमा केलेल्या निधीतून लाखो रुपयांचे अन्नधान्य, कपडे व औषधे यांचे वाटप केले होते. लॉकडाऊन झाल्यानंतर नियमांची अंमलबजावणी करण्यासाठी पोलीस, होमगार्ड रस्त्यावर कर्तव्य बजावत आहेत. तर ग्रामपंचायत सफाई कर्मचारी कचरा साफ करून स्वच्छता करत आहेत. या सर्वांना गरम नाष्टा देण्याचा उपक्रम ही शिवभक्ततर्फे राबविण्यात आला.

कोट

सद्या कोरोना या संसर्गजन्य आजाराचा फैलाव सर्वत्र होत आहे. संपूर्ण कुटुंबच्या कुटुंब कोरोना बाधित होऊ लागलेत. आजाराच्या तीव्रतेवर कुटुंबातील काही सदस्य दवाखान्यात तर काही घरी उपचार घेऊ लागलेत. यामुळे हे सर्व करताना कुटुंबातील प्रमुखांची तारांबळ उडत आहे. अशा कुटुंबातील सदस्यांना मोफत घरपोच जेवण देण्याचा उपक्रम शिवभक्त प्रतिष्ठानच्या वतीने सुरू केला आहे. यामुळे उंब्रज व परिसरातील गरीब व गरजू कोरोनाग्रस्त कुटुंबाना मदत मिळत आहेच. त्याच बरोबर त्यांचे मनोबल ही वाढत आहे.

विजय जाधव अध्यक्ष,शिवभक्त प्रतिष्ठान. उंब्रज