कऱ्हाडला फ्लाईंग ॲकॅडमी सुरु करणार

कऱ्हाड : कऱ्हाड विमानतळावर ॲम्बिशिअस फ्लाईंग स्कूल प्रायव्हेट लिमिटेड व एअरस्पीड एव्हिएशन प्रायव्हेट लिमिटेड यांच्यावतीने लवकरच फ्लाईंग ॲकॅडमी स्कूल सुरू करण्यात येणार असल्याची माहिती आमदार पृथ्वीराज चव्हाण यांनी पत्रकारांशी बोलताना दिली.

कऱ्हाड विमानतळ हे गोवा आणि पुणे विमानतळाला मध्यवर्ती आहे. गोवा आणि पुणे विमानतळावर हवाई दलाची वाहतूक मोठ्या प्रमाणात असल्याने तेथे खासगी विमान वाहतुकीला परवानगी दिली जात नाही. या पार्श्वभूमीवर कऱ्हाड विमानतळावर ॲकॅडमी सुरु करण्याबाबत शुक्रवारी चाचपणी करण्यात आली. पृथ्वीराज चव्हाण यांच्या उपस्थितीत दोन्ही कंपन्यांच्या प्रतिनिधींनी कऱ्हाड विमानतळावर एका विमानासह पाहणी केली. यावेळी परवेज दमानिया, मनोज प्रधान, विनोद मेमन, मिहीर भगवती उपस्थित होते.

कऱ्हाड विमानतळ हे फ्लाईंग ॲकॅडमी सुरू करण्यासाठी योग्य ठिकाण आहे. त्यामुळे महाराष्ट्र विमानतळ विकास कंपनीशी बोलून आवश्यक त्या परवानग्या घेऊन ही ॲकॅडमी लवकरात लवकर सुरू करण्यात येईल. यासाठी पृथ्वीराज चव्हाण यांचे महत्त्वाचे सहकार्य मिळत असल्याचे दमानिया यांनी सांगितले.

देशात 10 ठिकाणी तर महाराष्ट्रात 3 ठिकाणी हे स्कूल सुरू आहे. या अकादमीमध्ये स्थानिकांसह देशभरातून विद्यार्थी प्रवेश घेतील. विमान चालवण्याचे प्रशिक्षण घेऊन खाजगी विमान कंपन्यांमध्ये त्यांना संधी मिळू शकते. या कोर्सच्या माध्यमातून कराड परिसराच्या आर्थिक विकासालाही चालना मिळणार आहे. त्याचबरोबर प्रगतीचे नवे दालन खुले होत असल्याचे चव्हाण यांनी सांगितले. त्यामुळे आर्थिक प्रगतीला चालना मिळेल असे त्यांनी यावेळी सांगितले.

फोटो ओळ

कराड येथील विमानतळावर फ्लाईंग स्कूल सुरु करण्याबाबत आज चाचपणी झाली. यावेळी आमदार पृथ्वीराज चव्हाण व कंपन्यांचे पदाधिकारी