साताऱ्यात विवाहितेचा जाचहाट; पतीसह चौघांवर गुन्हा

सातारा : येथील एका विवाहितेचा जाचहाट केल्याप्रकरणी पती, सासू, नणंद हिच्यासह चौघांवर शाहूपुरी पोलीस ठाण्यात गुन्हा दाखल केला आहे. लक्ष्मण मुळीक, सुनंदा मुळीक, कल्याण येवले, राजेंद्र येवले अशी गुन्हा दाखल केलेल्यांची नावे आहेत.

याबाबत अधिक माहिती अशी की, अश्विनी लक्ष्मण मुळीक (वय २७, रा. मंगळवार पेठ, सातारा. सध्या रा. कामाठीपुरा पेठ, काळोखे चौक, सातारा) यांनी दिलेल्या तक्रारीत म्हटले आहे की, पती लक्ष्मण भीमराव मुळीक हे आणि सासू सुनंदा भीमराव मुळीक या दोघांनी ऑक्टोबर २०१३ पासून ते आजअखेर माहेरून दीड लाख रुपये आणि एक तोळ्याची अंगठी घेऊन ये म्हणून छळ केला. तसेच हाताने मारहाण, शिवीगाळ करण्याबरोबरच दमदाटी केली. अश्विनी यांची नणंद कल्याणी येवले आणि तिचा पती राजेंद्र येवले या दोघांनी त्यांच्या घरातील कामे करण्यास सांगितली. यास नकार दिला म्हणून या दोघांनी अश्विनी यांना शिवीगाळ करत दमदाटी केली.

याप्रकरणी अश्विनी यांनी मंगळवार, दि. १८ रोजी सायंकाळी सव्वासहा वाजण्याच्या सुमारास शाहूपुरी पोलीस ठाण्यात तक्रार दिल्यानंतर त्यांच्यावर गुन्हा दाखल केला. अधिक तपास पोलीस हवालदार जाधव करत आहेत.