कोरोना लस देण्याच्या यादीत म्हसवडचा नामोल्लेखही नाही!

म्हसवड : सातारा जिल्ह्यामध्ये १८ ते ४४ या वयातील नागरिकांच्या कोरोना लसीकरणाचा कार्यक्रम जिल्हा प्रशासनातर्फे राबवला जात आहे. ती लस जिल्ह्यात कोठे कोठे द्यावी, याचा आदेश जिल्हा परिषदेचे मुख्य कार्यकारी अधिकारी विनय गौडा यांनी दिले आहे. मात्र, या आदेशामध्ये माण तालुक्यातील सर्वांत मोठे शहर असलेल्या म्हसवडचा नामोल्लेखही नाही. यामुळे नागरिकांतून तीव्र नाराजी व्यक्त होत आहे. त्यामुळे म्हसवड सातारा जिल्ह्यात आहे की नाही, असा प्रश्न विचारला जात आहे.

सातारा जिल्ह्यातील सर्वांत जुनी व सर्वांत जास्त क्षेत्रफळ असलेली नगर परिषद म्हणून म्हसवडची वेगळी ओळख आहे. या शहराची लोकसंख्याही सुमारे ३२ हजारांहून अधिक आहे, तसेच या शहराच्या चारी बाजूंना बारा वाड्या आणि बारा खेडी आहेत, तर माण तालुक्यात आजवर सर्वाधिक कोरोना रुग्णही याच शहर परिसरात सापडले आहेत. त्यामुळेच या शहरात सध्या दोन कोरोना सेंटर आहेत. या सेंटरमध्ये म्हसवडसह परिसरातील लहान- मोठ्या गावांतील शेकडो रुग्ण उपचार घेत आहेत. हजारो जण कोरोनामुक्तही झाले आहेत.

कोरोनाला हरवायचे असेल, तर शासन नियमांचे पालन होणे गरजेचे आहे. तितकेच गरजेचे नागरिकांचे लसीकरण होणे आवश्यक आहे. यासाठीच शासनाने लसीकरणाची मोहीम अधिक तीव्र केली आहे. मात्र, त्या लसीचे नियोजन करण्यात प्रशासन कमी पडत आहे. म्हसवडसारख्या सर्वाधिक लोकसंख्या असलेल्या शहरात पन्नास ते साठ लस उपलब्ध होत असल्याने येथे लसीकरणाचा वेग मंदावला आहे, अशी परिस्थिती असताना आता शासनाने १८ ते ४४ वयोगटातील व्यक्तीच्या लसीकरणाचा कार्यक्रम राबवण्यास सुरुवात केली आहे. त्याचा अध्यादेशही मुख्य कार्यकारी अधिकारी गौडा यांनी काढला आहे. त्यांच्या आदेशानुसार माण तालुक्यात दहिवडी येथेच या वयोगटातील व्यक्तींचे लसीकरण होणार आहे.

तालुक्याचा विचार केल्यास दहिवडी येथे एकाच ठिकाणी लसीकरण होणार असल्याने तेथील आरोग्य यंत्रणेवर अधिक ताण येणारच आहे. तालुक्यातील १८ ते ४३ वयोगटातील व्यक्तींची संख्या मोठी आहे. दहिवडीबरोबरच म्हसवड येथेही सुविधा सुरू झाल्यास लसीकरणाचा वेग निश्चित वाढणार आहे. याशिवाय नागरिकांचा वेळ व पैसाही वाचणार आहे. शासनाची लस मोफत असली तरी ती घेण्यासाठी दहिवडीपर्यंतचा प्रवास या प्रत्येकालाच करावा लागणार आहे. दहिवडीपासून काही गावे जवळपास साठ किलोमीटर अंतरावर आहेत. या ठिकाणाहून लसीकरणासाठी जाणे प्रत्येकालाच शक्य होणार नाही. गेल्यास एका हेलपाट्यातच लस मिळेल याची खात्री नाही. त्यामुळे नागरिकांतून लसीकरणाला प्रतिसाद कितपत मिळेल, हे सांगता येत नाही. म्हसवड प्राथमिक आरोग्य केंद्रांतर्गत सहा उपकेंद्रे आहेत. लसीकरण सुरू झाल्यास म्हसवड शहरासह वरील उपकेंद्रांतील व पुळकोटी, पळशी या आरोग्य केंद्रांतील व्यक्तींना याचा लाभ लवकर मिळू शकतो.

चौकट

सर्वच आरोग्य केंद्रामध्ये लससाठी प्रयत्नशील : देसाई

जिल्ह्यात कोरोनाबाधितांची आकडेवारी मोठी आहे. जिल्ह्यातील बाधिताचे प्रमाण कमी करण्यासाठी तालुक्यात एक केंद्र देऊन उपयोग होणार नाही. वेळेत लसीकरणही होणार नाही. त्यामुळे शासकीय उद्दिष्ट पूर्ण करण्यासाठी तालुक्यातील प्रत्येक आरोग्य केंद्रात लस उपलब्ध करण्यासाठी प्रयत्नशील आहे. त्यासाठी पाठपुरावा सुरू आहे,’ अशी माहिती जिल्हा परिषद सदस्या सुवर्णा देसाई यांनी दिली.

कोट

माण तालुक्यातील पूर्व भागातील नागरिकांची गैरसोय दूर होण्यासाठी म्हसवड येथे शासनाने कोरोना प्रतिबंधात्मक लसीकरण केंद्र सुरू करावे, अशी मागणी केली आहे.

-नितीन दोशी,

माजी नगराध्यक्ष म्हसवड पालिका